सिमरा । बाराको जितपुर सिमरा–१६ टांगियाबस्तीमा स्थानीय र प्रहरीबीच भिडन्त दोहोरो भिडन्त भएको छ । हतियारसहित पक्राउ परेका ३५ वर्षका सागर लामालाई प्रहरी कार्यालयतर्फ लैजान नदिन करिब तीन सयको सङ्ख्यामा आएका स्थानीय र प्रहरी बीच भिडन्त दोहोरो भिडन्त भएको हो ।
इलाका प्रहरी कार्यालय निजगढबाट खटिएको प्रहरी टोलीले आज बिहान हतियार रहेको आशकामा छापा मारी लामालाई पक्राउ गरेको थियो । सोहि क्रममा स्थानीयहरुले प्रहरी टोलीमाथि ढुङ्गा मुढा गरी हतियारसहित पक्राउ परेका लामालाई हतकडी सहित भगाउन भएका हुन्।
दोहोरो भिडन्तमा प्रहरीतर्फ प्रहरी वरिष्ठ नायव निरीक्षक कलम बहादुर शाही र प्रहरी सहायक निरीक्षक बालराज गिरी घाइते भएका छन् । भिडन्तमा प्रहरीले पाँच राउन्ड हवाई फायर समेत गरेको छ ।
प्रहरीले छापा मारी लोड भएको भरुवा बन्दुक एक थान, बन्दुकको गोली २ वटा, बाघको दाँत जस्तो देखिने २ वटा, रौं १३ वटा र नङ्ग्रा ३ वटा बरामद गरेको छ ।वन्यजन्तुको सिकारीमा संलग्न रहेका लामाको खोजी कार्य भइरहेको प्रहरीले जनाएको छ ।
