काठमाडौँ । बलिउड गायक जावेद अली नेपाल आएका छन् । आज होटल सोल्टीमा आयोजना हुन लागेको ‘जावेद अली लाइभ इन नेपाल’ कार्यक्रममा साङ्गीतिक प्रस्तुति दिन उनी हिजै बिहीबार नेपाल आएका हुन् ।
उनका गीतहरु निकै लोकप्रिय रहेका छन् । उनले फिल्म ‘रकस्टार’ को ‘कौन फाया कौन’, ‘गजनी’ को ‘गुजारिश’, ‘रांझना’ को ‘तुम तक’, ‘बजरंगी भाईजान’को ‘तु जो मिला’ लगायतका ५ सय भन्दा बढी फिल्मका गीत गाएका छन् ।
सानैदेखि कब्वाली गायनको वातावरणमा हुर्किएका उनी विभिन्न संगीतिक रियालिटी शो हुँदै बलिउड फिल्म गायनमा छिरेका थिए । उनले नेपालमा भने पहिलो पटक प्रस्तुति दिन लागेका हुन् ।
लिक्विड इन्टेलिजेन्सले आयोजना गर्न लागेको कार्यक्रममा अलीले आफ्ना दर्जन बढी गीतहरु गाउने आयोजकले जनाएको छ ।
