काठमाण्डौ । काठमाण्डौ महानगरपालिकाले शुरु गरेको नि:शुल्क सार्वजनिक शौचालयको अभियानमा हातेमालो गरेर विद्यालय परिसरमा नि:शुल्क सार्वजनिक शौचालय स्थापना गर्ने काठमाण्डौ महानगरपालिका वडा नं ३१ शान्तिनगरको बेबिलोन नेशनल स्कुल पहिलो स्कुल बन्न सफल भएको छ ।
महानगरपालिकासंग सहकार्य गर्दै हाल महानगर क्षेत्रभित्र सञ्चालनमा रहेका ३६ वटा नि:शुल्क सार्वजनिक शौचालयमध्ये बेबिलोन स्कुल पहिलो शैक्षिक संस्था भएको उल्लेख गर्दै शैक्षिक विकास तथा सामाजिक उत्तरदायीत्व निर्वाह गरेको भन्दै काठमाण्डौ महानगरपालिकाले बेबिलोन स्कुललाई धन्यवाद समेत दिएको छ ।
साथै विद्यालय परिसरमा सञ्चालित नि:शुल्क सार्वजनिक शौचालयको सरसफाईको लागि आवश्यक पर्ने विभिन्न ३६ प्रकारका सामग्रीसहितको बाकस काठमाण्डौ महानगरपालिकाका अधिकृत भिमसेन केसीले बेबिलोन स्कुलकी अभिभावक संयोजक कमला केसीलाई हस्तान्तरण गरेका छन् ।
नि:शुल्क सार्वजनिक शौचालयको सरसफाईको लागि आवश्यक पर्ने ३६ प्रकारका सामग्रीमा बाल्टी, कुचो, खरेटो, ट्वाइलेट पेपर, डस्टबिन,जाम खोल्ने पम्प,प्राथमिक उपचार बाकस, हात धुने साबुन, झोल साबुन, डेटोल, फिनेल लगायतका सामग्री छन ।
काठमाण्डौ महानरगपालिकाको सहकार्यमा बेबिलोन स्कुलले सो नि:शुल्क सार्वजनिक शौचालय गत माघ महिनादेखि सञ्चालन गर्दै आएको छ भने दैनिक एकसयभन्दा बढी वटुवाले सो शौचालय नि:शुल्क प्रयोग गर्दै आएका छन् ।
विद्यालयका कर्मचारीले शौचालयको रेखदेख र सरसफाई नियमित रुपमा गर्दै आएका छन् ।
