काठमाडौँ । पूर्वराष्ट्रपति विद्यादेवी भण्डारी नेकपा (एमाले) पार्टी केन्द्रीय कार्यालयमा राखिएको पार्टीका उपाध्यक्ष सुवास नेम्वाङको पार्थिव शरीर देखेपछि भावविह्वल हुनुभएको छ ।
नेम्वाङको निधनमा श्रद्धाञ्जली अर्पण गर्न पुग्नुभएकी भण्डारीले आफ्नो आँसु थाम्न सक्नुभएन । अहिले नेम्वाङको पार्थिव शरीरमा माल्यार्पण गर्न च्यासलमा विभिन्न दलका नेता/कार्यकर्ताहरूको भीड लागेको छ । श्रद्धाञ्जली दिन च्यासल पुगेका सभामुख देवराज घिमिरे, नेकपा एकीकृत समाजवादीका सम्मानित नेता झलनाथ खनाललगायत सबै स्तब्ध र मलिन अनुहारमा छन् ।
पूर्वराष्ट्रपति भण्डारी एमाले अध्यक्ष केपी शर्मा ओली छेउको सोफामा बसेकी थिइन् । उहाँलाई सम्हाल्न कठिन भएको देखिन्थ्यो । उहाँले पटकपटक आँसु पुछिरहनुभएको थियो । उहाँलाई सम्हालिन गाह्रो भएपछि पार्टी कार्यालयमा एमाले अध्यक्षको कार्यकक्षमा आराम गर्न पठाइएको थियो ।
