एजेन्सी । शाहरुख खानको फिल्म जवानले बक्स अफिसमा हरेक दिन नयाँ रेकर्ड बनाइरहेको छ । चलचित्रले दर्शकबाट उत्कृष्ट प्रतिक्रिया पाइरहेको छ ।
यसैबीच, आइतबार सुपरस्टार शाहरुख आफ्ना प्रशंसकहरूप्रति कृतज्ञता व्यक्त गर्न आफ्नो घर ‘मन्नत’को बालकनीमा देखा परे । जसको एउटा भिडियो सामाजिक सञ्जालमा आएको छ । भिडियोमा ‘किंग खान’ बालकनीमा आफ्नो सिग्नेचर पोज दिइरहेको देखिन्छ ।
शाहरुखले नीलो टि–सर्ट र कालो ट्राउजर लगाएका छन् । उनले फ्यानहरूतर्फ हात हल्लाए र उनीहरूलाई फ्लाइङ किस दिइरहेको देखिन्छ । यति मात्र होइन, किङ खानले फ्यानलाई हात जोडेर अभिवादन पनि गरे ।
‘जवान’ भारतमा ५०० करोडको आँकडा पार गर्नेतर्फ द्रुत गतिमा अघि बढिरहेको छ । फिल्म ट्रेड एनालिस्ट मनोबाला विजयबलनका अनुसार वल्र्ड वाइड कलेक्शनको कुरा गर्ने हो भने फिल्मले रिलिजको ११ औं दिनमा ८०० करोडको कलेक्सन पार गरिसकेको छ ।
एट्लीद्वारा निर्देशित यो फिल्म सेप्टेम्बर ७ मा रिलिज भएको थियो । यस फिल्ममा शाहरुख खान, विजय सेतुपति र नयनतारा मुख्य भूमिकामा थिए । फिल्ममा दीपिकाको क्यामियो थियो । यी बाहेक सान्या मल्होत्रा, सुनिल ग्रोवर, प्रियमणी, रिद्धि डोग्रा, सञ्जिता भट्टाचार्यको पनि महत्वपूर्ण भूमिका छ ।
