काठमाडौँ । नेपाली कांग्रेसका महामन्त्री विश्वप्रकाश शर्माले शिक्षक आन्दोलनले अघिसारेका न्यायोचित माग सम्बोधन गर्नुपर्ने बताउनुभएको छ ।
सामाजिक सञ्जालमार्फत उहाँले भन्नुभएको छ, “वर्षौंपछि निर्माण हुँदै गरेको संघीय शिक्षा ऐनमार्फत वर्षौंदेखि अल्झिएका समस्याको हल खोज्नैपर्छ, हामी लोकतान्त्रिक राज्यप्रणालीमा छौँ, एक व्यक्ति मात्रको आवाज पनि सुन्ने कर्तव्य राज्यको हुन्छ भने लोकतान्त्रिक राज्यले लाखौँ शिक्षकको आवाज सुन्न र भावना बुझ्न ढिलाइ गर्नुहुन्न ।”
उहाँले प्रत्येक शिक्षकको आत्मसम्मान अभिवृद्धि गर्ने-गराउने कर्तव्य राज्यको र प्रत्येक विद्यार्थीको शैक्षिक भविष्यमा नकारात्मक असर पर्न नदिने अभिभावकत्व शिक्षकको प्रधान दायित्व हो भन्दै संवादमार्फत तत्काल समाधान खोजेर विद्यालय अविलम्ब सुचारू गर्न गराउन सरकार र शिक्षक नेतृत्वलाई अपील गर्नुभएको छ ।
