काठमाडौँ । अख्तियार दुरुपयोग अनुसन्धान आयोगले बाराको सिम्रौनगढ नगरपालिका–८ कचोर्वास्थित जनता माविको भवन निर्माण कार्यमा अनियमितता गरेको भन्दै ५ जनाविरुद्ध काठमाडौँ विशेष अदालतमा मुद्दा दायर गरेको छ ।
आयोगले अनुसन्धान गर्दा तत्कालीन प्रमुख प्रशासकीय अधिकृत विश्वराज मरासेनी र लेखा अधिकृत सर्मेन्द्रप्रसाद चौधरीले प्राविधिकले तयार गरेको मूल्यांकन र भुक्तानीका लागि स्वीकृत भएको टिप्पणीमा उल्लेख भएकोभन्दा बढी रकम उपभोक्ता समितिलाई भुक्तानी दिएको देखिएको उल्लेख गरेको छ ।
आयोगका प्रवक्ता भोला दाहालका अनुसार निजहरुले निर्माण कार्यमा भए गरेको परिमाणभन्दा बढी रु ६,५८,४४०र१६ भुक्तानी दिएको कारण भ्रष्टाचार निवारण ऐन, २०५९ बमोजिम निजहरुलाई सोही रकम बिगो कायम गरी कैद एवं जरिवाना गरी निजहरुबाट बिगो असुल उपर हुन मागदाबी लिइएको छ।
उक्त माविको भवन निर्माण समितिका अध्यक्ष रामबाबु प्रसाद यादव, सचिव रामाकान्त प्रसाद र कोषाध्यक्ष किरण देवी यादवले उपभोक्ता समितिको बैंक खाता सञ्चालन गरेको एवं नगरपालिकासँग भएको सम्झौताबमोजिमको शर्त पालना नगरी, भुक्तानीका लागि स्वीकृत भएको भन्दा बढी तथा निर्माण कार्यमा भए गरेको परिमाणभन्दा बढी रु ६,५८,४४०र१६ भुक्तानी लिएको उल्लेख गरेको छ ।
आयोगले भ्रष्टाचार निवारण ऐन, २०५९ बमोजिम निजहरुलाई रु ६,५८,४४०र१६ बिगो कायम गरी बिगोसमेत जफत हुन मागदाबी लिई आइतबार विशेष अदालत, काठमाडौँमा आरोप९पत्र दायर गरिएको जनाएको छ।
