काठमाडौं: उपप्रधान एवं गृहमन्त्री नारायणकाजी श्रेष्ठले मधेश प्रदेशमा सुरक्षा व्यवस्थाको पछिल्लो अवस्थाबारे जानकारी लिन थाल्नु भएको छ । उहाँले आज बर्दिवासमा सुरक्षा निकायका प्रमुखहरुसहितको बैठक डाक्नु भएको छ ।
गृहमन्त्री श्रेष्ठको सचिवालयका अनुसार गृहमन्त्री श्रेष्ठले पछिल्ला केही दिनदेखि मधेश प्रदेशको समसामयिक सुरक्षा चुनौतीबारे प्रमुख जिल्ला अधिकारीहरु र जिल्लास्थित सबै सुरक्षा निकायका प्रमुख एवं प्रदेश प्रमुखहरूबाट जानकारी लिनु भएको छ ।
खासगरी, जनकपुर र सर्लाहीमा विभिन्न समुदायबीच उत्पन्न झडप भएका थिए, र त्यहाँ स्थिति अझै पूर्ण शान्त भइसकेको छैन ।
बैठकमा गृहसचिव दिनेश भट्टराई, प्रवक्ता नारायणप्रसाद भट्टराई, प्रहरी महानिरीक्षक वसन्त बहादुर कुँवर र सशस्त्र प्रहरीका महानिरीक्षक राजु अर्याल, राष्ट्रिय अनुसन्धान विभागका प्रमुख, नेपाली सेना मधेस प्रदेश प्रमुखलगायतको बैठकमा सहभागिता छ ।
मन्त्रालयका अनुसार गृहमन्त्री श्रेष्ठले अन्य प्रदेशका सुरक्षा प्रमुखहरूबाट पनि ब्रिफिङ लिने तयारी गर्नु भएको छ ।
