काठमाडौ । नेपाली भाषासाहित्यका महारथी पण्डित श्यामदास वैष्णवको शुक्रबार साँझ ७ बजे आफ्नै घर ज्ञानेश्वरमा निधन भएको छ । उनको जन्म १९८१ साल साउन ५ गते काठमाडौँमा भएको थियो । पं.वैष्णवका श्रीमती जगतकुमारी वैष्णवका साथै तीन छोरा र चार छोरी छन् । वैष्णव २०७२ सालदेखि मनोरोगले पीडित थिए ।
वैष्णवको शुक्रबार राति नै पशुपति आर्यघाटमा दाहसंस्कार गरिने उनका जेठा छोरा प्रदीप वैष्णवले जानकारी दिए । वैष्णव महाकवि लक्ष्मीप्रसाद देवकोटाका अति प्रिय चेला थिए । देवकोटा व्यास र वैष्णव गणेश भएर देवकोटाका धेरै किताप लेखिएका थिए । वैष्णवलाई देवकोटाका छाया पनि भनिन्थ्यो ।
वैष्णवका कवितासङ्ग्रह र गीतिनाटक गरेर ७ वटा कृति प्रकाशित छन् । वैष्णवले हाम्रो संस्कृति, माधुर्य, झङ्कारको सम्पादन पनि गरेका थिए । वैष्णव गोरखादक्षिण बाहु, महेन्द्र प्रज्ञापुरस्कार, त्रिमूर्ति पुरस्कार, देवकोटा शताब्दी पुरस्कार, भानुभक्त पुरस्कार, मुक्ति पुरस्कार र नइ देरूनीख प्रदीप्ति पुरस्कारबाट सम्मानित थिए ।
