काठमाडौं । राष्ट्रिय क्रिकेट टीमका स्पिनर सन्दीप लामिछाने घरेलु मैदानमा हुन लागेको टी-२० विश्वकप छनोट प्रतियोगितामा सहभागि हुने बताईएको छ । मुलपानि मैदानमा जारी त्रिकोणात्मक टी-२० सिरिजमा अनुपस्थित रहेका सन्दीप टी-२० विश्वकप छनोटमा उपलब्ध हुने भएका हुन् ।
सन्दीपले परिवारसँग समय बिताउन चाहेको भन्दै त्रिकोणात्मक सिरिज अघि राष्ट्रिय टीमबाट नाम फिर्ता लिएका थिए । अहिले टीमले सन्दीप बिना नै सिरिज खेलिरहेको छ । अदालतमा विचाराधिन रहेको मुद्दाको कारण तनावमा रहेका सन्दीपले नेपालको लागि महत्वपूर्ण प्रतियोगितामा सहभागि होलान् कि नहोलान् भन्ने सबैमा चासोको विषय थियो । तर, क्रिकेटप्रेमी दर्शक एवं शुभचिन्तकको चाहनामा सन्दीप विश्वकप क्वालिफायर खेल्न तयार भएका बताईएको छ । यद्यपी, नेपाल क्रिकेट संघ (क्यान)ले विश्वकप छनोटका लागि टीम घोषणा गर्न भने बाँकी छ ।
नेपालले भोलि किर्तीपुरस्थित टियू क्रिकेट मैदानमा यूएईसँग त्रिकोणात्मक सिरिजको फाइनल खेल्दैछ । लगत्तै क्यानले सन्दीपसहित क्वालिफायरका लागि टीम घोषणा गर्ने बताईएको छ ।
आगामि जूनमा अमेरिका र वेस्ट इन्डिजमा हुन लागेको टी-२० विश्वकप २०२४को लागि एसिया क्षेत्रको छनोट प्रतियोगिता नेपालमा हुदैछ । यही अक्टोबर ३० बाट
मूलपानी र कीर्तिपुर मैदानमा हुने खेलहरुमा नेपालसहित आठ वटा देशले भाग लिनेछन् । प्रतियोगिताको फाइनलमा पुग्ने दुई टीम विश्वकपका लागि छनोट हुनेछन् ।
समूह ‘ए’ मा नेपालसँगै सिंगापुर, ओमान र मलेसिया रहेका छन् । यस्तै, समूह ‘बी’मा यूएई, हङकङ, कुवेत र बहराइन रहेका छन् । नेपालको सबै खेलहरु कीर्तिपुर मैदानमा हुनेछन् ।
