काठमाडौं: प्रधान सेनापति प्रभुराम शर्मा चीनको औपचारिक भ्रमणको सिलसिलामा बेइजिङतर्फ प्रस्थान गर्नु भएको छ ।
चीन भ्रमणका क्रममा प्रधान सेनापति बेइजिङमा आयोजना हुने बेइजिङ सियानसेन फोरमको समुद्घाटन समारोहमा सहभागी हुनुहुने नेपाली सेनाले जनाएको छ । उहाँको चिनियाँ जनमुक्ति सेनाका प्रमुख एवं प्रधान सेनापति जनरल लिउ झेन्लीसँग शिष्टाचार भेटघाट हुनेछ ।
चीनमा रहँदा प्रधान सेनापतिले ग्रेटवाल लगायत बेइजिङस्थित महत्वपूर्ण पर्यटकीय स्थलहरुको भ्रमण गर्नुका साथै चीनका लागि नेपालका राजदूतले आयोजना गर्ने रात्रीभोजमा सहभागी हुने कार्यक्रम रहेको छ ।
प्रधान सेनापति शर्माले सियान सिटी, साघांई तथा ग्वान्झाओमा अवस्थित चिनियाँ जनमुक्ति सेनाका विभिन्न इकाई तथा शिक्षण संस्थाहरुको भ्रमण गरी कार्तिक १६ गते स्वदेश फिर्ता हुने सेनाको विज्ञप्तिमा उल्लेख छ ।
बेइजिङतर्फ प्रस्थान गर्नुअघि प्रधान सेनापति शर्मालाई त्रिभुवन अन्तर्राष्ट्रिय विमानस्थलमा रक्षा सचिव किरणराज शर्मा तथा बलाध्यक्ष रथी सिताराम खड्काले बिदाइ गर्नु भएको थियो । आजै प्रधान सेनापतिलाई सेनाको एक टुकडीले सम्मान गारत अर्पण गरेको थियो ।
भ्रमणदलमा मध्यपूर्वी पृतनापति उपरथी प्रेमध्वज अधिकारी, प्रधान सेनापतिको सैनिक सहायक तथा स्टाफ अधिकृत लगायतको सहभागिता रहेको छ ।
प्रधान सेनापतिको अनुपस्थितिमा बलाध्यक्ष रथी सिताराम खड्काले कायममुकायम प्रधान सेनापति भई कार्यभार सम्हाल्नु हुने पनि नेपाली सेनाको भनाई छ ।
यसअघि प्रधान सेनापति शर्माले भारत र बेलायतको भ्रमण गर्नु भएको छ ।
