एजेन्सी । विश्वकप २०२३ को ३७ औँ खेल भारत र दक्षिण अफ्रिकाबीच कोलकाताको इडेन गार्डेन क्रिकेट स्टेडियममा भएको थियो । फ्यानहरु यो खेलको प्रतिक्षामा थिए ।
किनभने, यस प्रतियोगितामा दुवै टोली उत्कृष्ट लयमा थिए र यो तालिकाको शीर्ष स्थानमा रहने लडाइँ थियो । खेलका क्रममा पूरै रंगशाला दर्शकले खचाखच भरिएको थियो । यस खेलको क्रेज मैदानमा जारी रहँदा, रेकर्ड संख्यामा मानिसहरूले यो महान् खेल अनलाइन ओटीटी प्लेटफर्ममा समेत प्रत्यक्ष हेरेका थिए । विश्वकपको यो खेलले दर्शकको पुरानो रेकर्ड तोड्यो ।
भारत–दक्षिण अफ्रिकाको खेल एकै पटक हटस्टारमा ४.४ करोड मानिसले हेरे । विराट कोहलीले एकदिवसीय क्रिकेटमा आफ्नो ४९ औं शतक पूरा गर्दा दर्शकको संख्या सबैभन्दा बढी थियो । यो समयमा सबै दर्शकको रेकर्ड तोडियो ।
भारत–दक्षिण अफ्रिकाबीचको खेलमा भारत–न्युजिल्याण्ड म्याचको कीर्तिमान तोडिएको छ । यस टूर्नामेन्टमा भारत र न्युजिल्यान्डबीचको खेल हटस्टारमा ४.३ करोड मानिसले एकै साथ हेरेका थिए । यसअघि १४ अक्टोबरमा भारत–पाकिस्तान खेल ३.५ करोड मानिसले हेरेका थिए ।
भारतले दक्षिण अफ्रिकालाई २४३ रनले पराजित गर्यो । योसँगै टीम इन्डियाको अपराजित यात्रा जारी छ । लगातार आठ जित हात पार्दै अंक तालिकाको शीर्ष स्थानमा रहेको भारत अब शीर्ष स्थानमै रहेर अन्तिम चारमा पुग्ने भएको छ ।
