एजेन्सी । इन्डियन प्रिमियर लिग (आईपीएल)सँग जोडिएको ठूलो खबर बाहिर आएको छ । गुजरात टाइटन्सले कप्तान हार्दिक पाण्ड्यालाई रिलिज गर्ने निर्णय गरेको छ ।
हार्दिक फेरि आफ्नो पुरानो टिम मुम्बई इन्डियन्समा फर्किँदैछन् । गुजरात टोलीसँग सम्बन्धित स्रोतहरूले यो खबरको पुष्टि गरेका छन् । शुभमन गिललाई गुजरातको कमाण्ड दिनसक्ने स्रोत बताउँछ ।
अहिले आईपीएलको व्यापारिक ढोका खुला छ । यसको मतलब टोलीहरूले आफ्ना खेलाडीहरूलाई रिलिज गर्न र अन्य कुनै टोलीसँग खेलाडीहरू साटासाट गर्न सक्छन् । पाण्ड्याको हकमा अहिले दुवै फ्रेन्चाइजीले हरेक किसिमको सम्झौताको सम्भावनामा काम गरिरहेको बताइएको छ ।
मुम्बई इन्डियन्सले पाण्ड्याका लागि गुजरातलाई १५ करोड रुपैयाँ दिने सम्भावना छ । यस्तो अवस्थामा मुम्बईले गुजरातसँग कुनै खेलाडीको व्यापार गर्नु पर्दैन। तर, यो सिजनका लागि मुम्बईसँग ५.५ करोड मात्रै बाँकी छ । बाँकी ९.५ करोडको लागि उसले महँगो खेलाडी रिलिज गर्नुपर्नेछ ।
अर्को सम्भावना यो छ कि मुम्बईले पनि पाण्ड्याको मूल्यको नजिक आफ्नो खेलाडी गुजरातलाई बेच्न सक्छ । दुवै अवस्थामा मुम्बईले आफ्ना एक महँगो खेलाडीलाई रिहा गर्नुपर्नेछ ।
मुम्बईसँग हाल यस्ता चार खेलाडी छन् र यदि उनीहरूले कुनै एकलाई रिहा गरे वा व्यापार गरेमा उनीहरूको काम हुनेछ । यी खेलाडी हुन् क्यामरन ग्रीन (१७.५ करोड), रोहित शर्मा (१६ करोड), इशान किशन (१५.२५ करोड) र जसप्रित बुमराह (१२ करोड) ।
गुजरात टाइटन्स टोली पहिलो पटक आईपीएल २०२२ सिजनमा प्रवेश गरेको थियो । हार्दिकको कप्तानीमा टोलीले पहिलो सिजनमा नै च्याम्पियन बन्ने गौरव हासिल गरेको थियो । गुजरातको टोली २०२३ सिजनको फाइनलमा पनि पुगेको थियो, जहाँ चेन्नई सुपर किंग्ससँग पराजित भएको थियो । यति धेरै सफलताका बाबजुद पनि गुजरातको टोली र पाण्ड्याको प्रस्थानले फ्यान र क्रिकेट विज्ञहरु आश्चर्यमा परेका छन् ।
हार्दिक पाण्ड्याले आफ्नो आईपीएल करियर २०१५ मा मुम्बई इन्डियन्सबाट सुरु गरेका थिए । उनको उपस्थितिमा मुम्बईले ४ पटक आईपीएलको उपाधि जितेको थियो । हार्दिक २०२१ सम्म मुम्बई इन्डियन्समा रहे । यसपछि उनी घाइते भए र फर्कँदा उनले बलिङ गरेका थिएनन् । मुम्बईले उनलाई २०२२ मा रिहा गरेको थियो । त्यसपछि उनी दुई सिजन गुजरात टाइटन्सका कप्तान रहे ।
