एजेन्सी । भारतको अयोध्यामा राम मन्दिरको उद्घाटनका लागि गुजरातको वडोदरामा १०८ फिट लामो अगरबत्ती बनाइएको छ । मन्दिरमा भगवान रामको मूर्तिको अभिषेकका बेला यो धूप बालिनेछ ।
अयोध्यामा मन्दिर उद्घाटनको तयारी तीव्र गतिमा भइरहेको छ । सहरमा विभिन्न पूर्वाधार निर्माणका आयोजनाहरु भइरहेका छन् । जसमा सडक, भवन र विमानस्थल निर्माण पर्दछन् ।
अयोध्याको अन्तर्राष्ट्रिय विमानस्थलको पहिलो चरणको काम डिसेम्बरको अन्त्यसम्ममा सम्पन्न हुनेछ । यसले मन्दिरको उद्घाटनपछि आउने महिनाहरूमा यहाँ आउने लाखौं तीर्थयात्रीहरूलाई यात्रामा सहजता प्रदान गर्नेछ ।
उत्तर प्रदेश सरकारले अयोध्याको विकासका लागि थप १७५ करोड रुपैयाँ विनियोजन गरेको छ । यो रकम अयोध्या संरक्षण तथा विकास कोष, रामोत्सव र अन्तर्राष्ट्रिय रामायण तथा वैदिक अनुसन्धान संस्थानको विकास र विस्तारका लागि प्रयोग गरिनेछ ।
‘रामोत्सव’ २०२३–२४ को लागि १०० करोड भारु र अयोध्यामा अन्तर्राष्ट्रिय रामायण र वैदिक अनुसन्धान संस्थानको विकास र विस्तारको लागि २५ करोड रूपैयाँ विनियोजन गरिएको छ ।
