काठमाडौँ । संघीय सरकारमाथि दबाब बढाउन सातै प्रदेशका मुख्यमन्त्रीहरु हेटौँडामा भेला भएका छन् । संघीय सरकारले प्रदेश सरकारका अधिकारमाथि हस्तक्षेप गरेको भन्दै उनीहरु संघर्षमा उत्रिएका छन् ।
हेटौँडामा बिहीबारदेखि अन्तरप्रदेश मन्त्रिपरिषद्को भेला सुरु भएको छ । संघीय सरकारविरुद्ध थप रणनीति तय गर्न उनीहरु बागमती प्रदेशको राजधानी हेटौँडामा भेला भएका हुन् । गण्डकी प्रदेश राजधानी पोखरामा पनि गत चैतमा मुख्यमन्त्रीहरुको भेला सम्पन्न भएको थियो ।
संविधानले व्यवस्था गरेका अधिकारहरु केन्द्र सरकारले नदिएको गुनासो गर्दै मुख्यमन्त्रीहरु पछिल्लो समय संघीय सरकारविरुद्ध आन्दोलित छन् ।
हेटौँडा भेलामा सहभागी हुने मुख्यमन्त्रीहरुमा कोशीका केदार कार्की, मधेशबाट सरोजकुमार यादव, बागमतीका शालिकराम जम्मकट्टेल, गण्डकीका सुरेन्द्रराज पाण्डे , लुम्बिनीका डिल्लीराम चौधरी, कर्णालीका राजकुमार शर्मा र सुदूरपश्चिमबाट कमलबहादुर शाह हुनुहुन्छ ।
संघीयता कार्यान्वयनमा देखिएका अस्पष्टता र दोहोरोपन हटाउनुपर्ने, तीन तहका साझा सूचीमा रहेका अधिकारसम्बन्धी कानून निर्माणमा सहकार्य गर्नेुपर्नेजस्ता मागसहित उनीहरु भेला भएको बताइएको छ ।
