काठमाडौँ । काठमाडौँको सिताइलामा तीन जनाको हत्या भएको छ । सोलुखुम्बुको दुधकुण्ड नगरपालिका घर भई नागार्जुन नगरपालिका–६ भैरबटोलमा बस्ने राजु घिमिरे भनिने काजी बिकले आफ्नो श्रीमती सहित तीन जनाको हत्या गरेको प्रहरीले जनाएको छ ।
मृत्यु हुनेमा ३८ वर्षीया ईश्वरी श्रेष्ठ, उनकी छोरी ८ वर्षकी अनिशा श्रेष्ठ र साढे २ वर्षकी नातिनी सिवानी श्रेष्ठ रहेका छन् ।
ईश्वरी र बच्चाको हत्या गरी राजुले पछि नजिकैको जंगलमा गई आत्महत्या गरेका थिए। बुधबार बिहान भएको उक्त हत्याको घटनापछि काजी नागार्जुनको जंगलमा झुण्डिएको अवस्थामा फेला परेका थिए । हत्यापछि काजीले ईश्वरीका आफन्तलाई समेत फोन गरेर घटनाबारे जानकारी दिँदै आफू पनि मर्न गइरहेको बताएका थिए ।
ईश्वरीले काजीसँग दोस्रो विहे गरेको र शिवानी उनको यसअघिका श्रीमानबाट जन्मेका छोराको छोरी रहेको अनुसन्धननबाट खुलेको प्रहरीले जनाएको छ । ईश्वरीकी अहिलेको श्रीमानबाट एक छोरा रहेको र उनलाई काजीले उनलाई बाहिर पठाएर तीन जनाको हत्या गरेको खुलेको छ ।
बालकले प्रहरीलाई बुबाले आफूलाई पैसा लिन पठाएको र फर्केर आउँदा हत्या गरेको पाईएको बताएका छन् । आफू कोठामा आइपुग्दा बुबाले घटनाबारे बताएको र मर्न जान्छु भनेर गएको उनले बताएका छन् ।
उनीहरुबीच पारिवारिक विवाद रहेको र हत्या गरिएको बताइएको छ । घटनास्थलबाट प्रहरीले हम्बर र चक्कु बरामद गरेको छ ।काजीले श्रीमतीलाई हम्बर र बच्चालाई चक्कु प्रहार गरेको जस्तो देखिएको प्रहरीले जनाएको छ ।
