काठमाडौं । संसद्को राज्य व्यवस्था तथा सुशासन समितिले आज उपप्रधान तथा गृहमन्त्री रवि लामिछानेलाई बोलाएको छ । गृह मन्त्रालयले पछिल्लो समय गरेका कामकारबाहीबारे जानकारी लिन समितिले गृहमन्त्री लामिछानेलाई बोलाएको छ ।
राज्य व्यवस्था समितिको आज ११ बजे बैठक बस्दैछ । बैठकमा गृहमन्त्रीसँग मन्त्रालयका कारबाहीबारे जानकारी लिने तयारी छ । राज्य व्यवस्था तथा सुशासन समितिका सभापति रामहरि खतिवडा गृहमन्त्रीका कामप्रति रुष्ट छन् । उनले गृहमन्त्रीले जथाभावी आदेश दिएर नागरिकलाई पक्राउ गरेको भन्दै असन्तुष्टि जनाउँदै आएका छन् ।
विशेष गरी कांग्रेसका सांसदसमेत रहेका उद्योगी विनोद चौधरी र उनका भाइ अरुण चौधरीमाथि छानबिन भइरहेकोमा खतिवडा रुष्ट देखिएका हुन् । बाँसबारी छालाजुत्ता कारखानाको जग्गा अनधिकृत रुपमा हडपेको आरोपमा नेपाल प्रहरीको केन्द्रीय अनुसन्धान ब्यूरोले विनोद चौधरी र अरुण चौधरीमाथि छानबिन गरिरहेको छ ।
त्यसैगरी गृहमन्त्री लामिछानेले कांग्रेसका केही नेताहरुमाथि अनियमिताको आशंकामा सीआईबीमार्फत् छानबिन गराइरहेका छन् । गृहमन्त्रीविरुद्ध कांग्रेसले संसद्मा आवाज उठाइरहे पनि सुनुवाइ भएको छैन । यही बेला राव्य व्यवस्था समितिले गृहमन्त्रीलाई बोलाएर उनको कामका बारेमा समीक्षा गर्न लागेको हो ।
राज्य व्यवस्था समितिमा सहकारी पीडितहरुले उजुरी दिएका छन् । आजको बैठकमा समितिका सभापति खतिवडाले त्यसबारे पनि गृहमन्त्रीको धारणा माग्ने तयारी गरेका छन् ।
गृहमन्त्री लामिछानले पनि राज्य व्यवस्था समितिले बोलाएको बैठकमा सहभागी हुने र आफ्ना कुरा स्पष्टसँग राख्ने तयारी गरेका छन् ।
