काठमाडौँ । इन्डियन प्रिमियर लिग (आईपीएल)को १० औं खेलमा १७ औं सिजनको महत्वपूर्ण कीर्तिमान तोडिएको छ ।
कोलकाता नाइट राइडर्सले घरेलु टोली रोयल च्यालेन्जर्स बैंग्लोरलाई ७ विकेटले पराजित गरेको छ । यसअघिका ९ खेलमा घरेलु टोलीले मात्र जित हासिल गरेको थियो । प्लेयर अफ द म्याच सुनिल नारायणले आफ्नो टी–२० करियरको ५०० औं खेल खेले ।
आरसीबीका स्टार ब्याट्सम्यान विराट कोहलीले आईपीएलमा आफ्नो ५२औँ अर्धशतक बनाए, यस इनिङमा ४ छक्का सामेल छन् । योसँगै उनी आईपीएलमा कुनै टिमबाट सर्वाधिक छक्का प्रहार गर्ने खेलाडी बनेका छन् । उनले क्रिस गेलको कीर्तिमान तोडे ।
उनले आईपीएलमा २४१ छक्का प्रहार गरेका छन् । उनी सन् २००८ देखि एउटै टोलीबाट खेल्दै आएका छन् र अहिले आईपीएल टोलीका लागि सबैभन्दा बढी छक्का प्रहार गर्ने खेलाडी बनेका छन् ।
उनीपछि आरसीबीकै क्रिस गेल र एबी डिभिलियर्स छन् । आरसीबीका लागि गेलले २३९ र डिभिलियर्सले २३८ छक्का प्रहार गरेका छन् । यस्तै, चौंथो नम्बरमा मुम्बई इन्डियन्सका कियरोन पोलार्ड रहेका छन् । उनले २२३ छक्का प्रहार गरेका छन् । यस्तै मुम्बइकै रोहित शर्मा २१० छक्काका साथ पाँचौं नम्बरमा छन् ।
