एजेन्सी । कोलकाता नाइट राइडर्स (केकेआर)का कप्तान श्रेयस अय्यरलाई १२ लाख रुपैयाँ जरिवाना गरिएको छ । मंगलबार कोलकातामा राजस्थान रोयल्स (आरआर)विरुद्धको खेलमा स्लो ओभर रेटका कारण अय्यरलाई जरिवाना गरिएको हो ।
इन्डियन प्रिमियर लिग (आईपीएल)ले बुधबार यो जानकारी दिएको छ । आईपीएलको १७ औँ सिजनमा मंगलबार कोलकाता नाइट राइडर्स राजस्थान रोयल्ससँग २ विकेटले पराजित भयो । इडेन गार्डेन स्टेडियममा भएको खेलमा राजस्थानले टस जितेर बलिङ रोजेको थियो ।
कोलकाताले २० ओभरमा ६ विकेट गुमाएर २२३ रन बनाएको थियो । सुनिल नारायणले ५६ बलमा १०९ रन बनाए । राजस्थानले निर्धारित २० ओभर खेल्दै ८ विकेट गुमाएर २२४ रन बनाएको थियो ।
आईपीएल अधिकारीहरूले यो सिजन कोलकाताको टोलीको पहिलो गल्ती भएकोले आईपीएलको आचारसंहिता अनुसार न्यूनतम सजाय दिइएको बताएका छन् ।
२० औं ओभरमा राजस्थानलाई जितका लागि ९ रन आवश्यक थियो । केकेआर टोली निर्धारित समयमा ओभर पूरा गर्न पछि परेको थियो । जसका कारण अन्तिम ओभरमा अय्यरले ५ को सट्टा ४ खेलाडी मात्रै बाउन्ड्रीमा पठाउन सके ।
