काठमाडौँ । इंग्लिस प्रिमियर लिग फुटबल अन्तर्गत आज विशेष खेल हुँदैछ । उपाधि होडमा रहेको आर्सनलले म्यान्चेस्टर युनाइटेडको सामना गर्दैछ ।
आर्सनल र म्यान्चेस्टर युनाइटेडबीचको खेल युनाइटेडको घरेलु मैदान वर्ल्ड ट्राफोर्डमा नेपाली समयानुसार राति ९ः१५ बजे सुरु हुनेछ । आर्सनललाई यो खेल ‘गर या मर’को अवस्थामा छ ।
जित्नैपर्ने दबाबमा आर्सनल रहेको छ । हिजो शनिबार म्यान्चेस्टर सिटीले फुलहममाथि ४–० गोलको जित निकाल्दै अंकतालिकामा शीर्षस्थानमा उक्लिएको छ । सिटीको ३६ खेलबाट ८५ अंक छ भने आर्सनलको समान खेलबाट ८३ अंक छ ।
आर्सनलले चार खेलअघि एस्टन भिल्लासँग हार ब्यहोरेपछि उसलाई उपाधि होडमा थप कठिन बनेको हो । आर्सनलले आजको युनाइटेडसँगको खेलपछि अन्तिममा एभर्टनसँग प्रतिस्पर्धा गर्नेछ भने म्यान्चेस्टर सिटीले टोटेनहम र वेस्ट हाम युनाइटेडसँग खेल्नेछ ।
यता, तेस्रो स्थानमा रहेको लिभरपुलको ३६ खेलबाट ७८ अंक छ । एस्टन भिल्ला ६७ अंकसहित चौंथो स्थानमा छ । यी दुई टोलीबीच सोमबार राति १२ः४५ बजे खेल हुनेछ ।
