एजेन्सी । पञ्जाब किंग्सका अलराउन्डर लियाम लिभिङस्टोन अर्को महिना हुने टी–२० विश्वकपअघि घुँडाको चोटबाट निको भएर सोमबार इंग्ल्याण्ड फर्किएका छन् ।
लिभिङस्टोन बाहेक, जोस बटलर (राजस्थान रोयल्स), विल ज्याक र रीस टोपले (रोयल च्यालेन्जर्स बैंगलोर) पनि मे २२ मा पाकिस्तानविरुद्ध सुरु हुने टी–२० शृङ्खलाअघि इंग्ल्याण्ड टोलीमा सामेल हुन आईपीएल छोडेका छन् ।
यद्यपि, पञ्जाब किंग्स १२ खेलमा चार जित हात पार्दै आईपीएल प्लेअफको दौडबाट बाहिर छ । लिभिङस्टोनले इन्स्टाग्राममा लेखेका छन्, ‘आईपीएलको अर्को वर्ष, आगामी विश्वकपका लागि मेरो घुँडा फिक्स गर्नुपर्नेछ । पञ्जाब किंग्सका फ्यानहरूलाई उनीहरूको माया र समर्थनको लागि फेरि पनि धन्यवाद ।’
राजस्थान भने प्लेअफमा पुग्ने लगभग पक्का छ । पाकिस्तानविरुद्धको शृङ्खलापछि साविक विजेता इंग्ल्याण्डको टोली आइसीसी टी–२० विश्वकपका लागि वेस्ट इन्डिज प्रस्थान गर्ने छ, जहाँ उसले जुन ४ मा स्कटल्याण्डविरुद्ध बार्बाडोसको ब्रिजटाउनमा आफ्नो विश्वकपको यात्रा सुरु गर्नेछ ।
आईपीएल खेल्ने इंग्ल्याण्डको विश्वकप टोलीमा रहेका मोइन अली (चेन्नई सुपर किंग्स), साम करन, जोनी बेयरस्टो (दुबै पञ्जाब किंग्स)र फिल साल्ट (कोलकाता नाइट राइडर्स) पनि चाँडै स्वदेश फर्कनेछन् ।
