काठमाडौँ । प्रमुख प्रतिपक्ष दल नेपाली कांग्रेसको आह्वानमा विपक्षी दलहरुको बैठक आज बस्दै छ । सरकारले बजेट सार्वजनिक गर्नुअघि विपक्षी दलहरुको बैठक बस्न लागेको हो । बैठक आज बिहान १० बजे संसद् भवनमा बस्नेछ ।
संसद्मा विपक्षीहरुको समान धारणा बनाउन बस्ने बैठकमा राष्ट्रिय प्रजातन्त्र पार्टी (राप्रपा), जनता समाजवादी पार्टी (जसपा) नेपाल, लोसपा र राष्ट्रिय जनमोर्चाका नेताहरू सहभागी हुनेछन् ।
सरकारले आज बजेट ल्याउने तयारी गरेको सन्दर्भमा यसबारे समान धारणा बनाउन विपक्षी दलको बैठक बस्न लागेको हो । बजेट प्रस्तुत गर्न आज दिउँसो एक बजे संयुक्त सदनको बैठक आह्वान गरिएको छ ।
यसैबीच प्रमुख प्रतिपक्ष दल नेपाली कांग्रेसको संसदीय दलको बैठक पनि आजै बस्दैछ । संघीय संसद भवनको ल्होत्से हलमा ११ बजे बैठक बस्ने छ ।
सरकारले आज बजेट ल्याउने तयारी गरिरहेका बेला कांग्रेस संसदीय दलको बैठक बस्न लागेको हो । कांग्रेसले केही समयदेखि सहकारी ठगीबारे अनुसन्धान गर्न संसदीय समिति गठन गर्न माग गर्दै संसद अवरुद्ध गर्दै आएको थियो ।
