काठमाडौं । प्रधानमन्त्री पुष्पकमल दाहाले भारतमा नरेन्द्र मोदीले तेस्रो कार्यकालका लागि लिन लाग्नुभएको सपथ ग्रहण समारोहमा सहभागी हुन भारत जाने भएका छन् ।
भारतमा मोदीले शनिबार सपथ लिने तयारी गरेका छन् । मोदीले शनिबार विशेष समारोहकाबीच राष्ट्रपतिसमक्ष सपथ लिने छन । त्यही कार्यक्रममा सहभागी हुन प्रधानमन्त्री दाहाल शनिबार बिहान नयाँ दिल्ली जाने भएका हुन् ।
प्रधानमन्त्री दाहाल, भुटानी राजा, श्रीलंकाका रास्ट्रपति, बंगलादेश तथा मौरिससका प्रधानमन्त्रीहरु पनि सपथ ग्रहण समारोहमा सहभागी हुने बताइएको छ ।
सन् २०१४ मा बीजेपीबाट एकल बहुमत आएको सरकार बनाएर सपथ गरेका मोदीले विदेशी सरकार तथा रास्ट्रप्रमुख बोलाएका थिए । त्यो बेला उनले सार्क देशलाई निम्तो दिएका थिए ।
त्यही बेलाबाट भारतको छिमेक पहिलो अर्थात् ‘नेबरहुड फस्र्ट’ विदेश नीति चर्चा गरिएको थियो । दशकपछि यो पटक शपथ ग्रहण समारोहमा भने मोदीले अफगानिस्तान तथा पाकिस्तानबाहेकका सार्क देशलाई मात्र बोलाएका छन् ।
चुनावमा भारतीय जनता पार्टीले आफ्नै बलमा बहुमत ल्याउन नसके पनि पार्टी नेतृत्वको गठबन्नले २ सय ९३ सिट जितेको छ । सरकार बनाउन तल्लो सदनमा बहुमतका लागि २ सय ७२ जना चाहिन्छ ।
भाजपा नेतृत्वको एनडीए गठबन्धनले मोदीलाई प्रधानमन्त्री बनाउने निर्णय गरिसकेको छ ।
