काठमाडौं । आज बिहानैदेखि नेकपाका दुई अध्यक्षका दुई अलग अलग बैठक भए र तिनको अनेक थरका समाचार आए । उता बालुवाटारमा प्रधानमन्त्री एवं एक अध्यक्ष केपी ओली पक्षको बैठक भयो भने यता बबरमहलमा पुष्पकमल दाहाल, प्रचण्ड पक्षको बैठक सम्पन्न भयो ।
संसद विघटन गरेका प्रधानमन्त्री ओलीप्रति यता प्रचण्ड भने निकै आक्रोषित भएका थिए । बबरमहलको एक पार्टी प्यालेसमा आयोजित सो बैठकमा बोल्दै अध्यक्ष प्रचण्डले आफूलाई ओलीले निकै दुःख दिएको र अपमान गरेको दुखेसो पोखे ।
प्रचण्डले ओलीलाई यतिसम्म दुःख पोखे कि पार्टी एकता भएको गएको साढे दुई वर्षको अवधिमा आफूलाई ओलीले बोल्न पनि नदिएको बताएका थिए । उनले भने, साढे दुई वर्ष विचित्रले बिताइयो, बैठकमा मलाई बोल्न दिइएन । उनले आफूले पार्टी बैठकमा पनि बोल्न नपाएको बताएका थिए ।
आफूले पाएको दुःख देखेर पनि प्रचण्डले ओलीको कार्यशैली कम्युनिष्टसँग विल्कुलै नमिल्ने उनले बताएका थिए । उनले भने, मलाई त ओली कम्युनिष्ट हुन् भन्ने नै लाग्दैन किनभने उनीमा कम्युनिष्ट पार्टीको एक कार्यकर्तामा हुनुपर्ने कुनै पनि गुण छैन ।
कुनै बेला भावुक हुदै त कुनैबेला आक्रोस पोख्दै करिब एक घन्टा बोलेका प्रचण्डले ओलीप्रति निकै तितो पोखे । यसै क्रममा ओलीलाई प्रचण्डले प्रश्न गरे– एकतिहाइको संख्या लिएर बसेका ओलीले तीन तिहाई सदस्य थप्न मिल्छ ?
