काठमाडौँ । वुमन्स एसिया कपको उपाधि श्रीलंकाले जितेको छ । भर्खरै सम्पन्न फाइनलमा खेलमा भारतलाई ८ विकेटले हराउँदै आयोजक श्रीलंकाले पहिलोपटक उपाधि जितेको हो ।
१६६ रनको लक्ष्य पाएको श्रीलंकाले १८.४ ओभरमा २ विकेट गुमाएर लक्ष्य भेट्टायो । उसका लागि हर्षिता समराविक्रमाले सर्वाधिक ६९ रनको अविजित योगदान दिइन् । ५९ बल खेलेकी उनले ६ चौका र २ छक्का प्रहार गरिन् । यस्तै, चमारी अथपथ्थुले ४३ बलमा ६१ रनको योगदान दिइन् । यस्तै, कविसा दीलहरी १६ बलमा ३० रनसहित अविजित रहिन् ।
भारतका लागि बलिङमा दिप्ती शर्माले एकमात्र विकेट लिइन् ।
त्यसअघि टस जितेर पहिले ब्याटिङ गरेको भारतले २० ओभरमा ६ विकेट गुमाएर १६५ रन जोडेको थियो । उसका लागि स्मृति मन्धनाले ६०, ऋचा घोषले ३०, जेमिना रोड्रीग्वेजले २९, शेफाली वर्माले १६ हरमनप्रीत कौरले ११ रन जोडिन् ।
बलिङतर्फ श्रीलंकाका कविसा दीलहरीले २, सचिनी निसन्सला, चमारी अथपथ्थु र उडेसिका प्रवोधनीले १–१ विकेट लिए । महिला एसिया कपमा भारत सर्वाधिक सफल टीम हो । आजको समेत गरी ९ संस्करणमा भारतले ७ पटक यस प्रतियोगिताको उपाधि जितेको छ ।
