काठमाडौं । उखुको भुक्तानी नपाएपछि सर्लाहीका किसानहरु पुनः आन्दोलन गर्न काठमाडौं आइपुगेका छन् । चिनी मिलहरूबाट एक वर्ष बित्दा पनि सबै रकम भुक्तानी नपाएपछि उखु किसान संघर्ष समितिको अगुवाईमा किसानहरु काठमाडौं आएका हुन् । आइतबार माइतीघरमा आन्दोलन थाल्ने तयारी छ । सरकारी तथ्याङ्क अनुसार उखु मिलसंग किसानले अझै ५२ करोड भन्दा धेरै बक्यौता पाउनु पर्नेछ ।
गतवर्ष उद्योग वाणिज्य तथा आपर्ति मन्त्रालयले एक महिनाभित्रै भुक्तानी दिलाइदिने भनेर पुष १८ गते किसानहरुसँग सहमति गरेको थियो । उखु किसान संघर्ष समितिका संरक्षक राकेश मिश्रका अनुसार केही काठमाडौं आलिएसकेका छन् भने अरु आउँदैछन् । यस पटकको आन्दोलनमा एक हजार किसानले सहभागीता जनाउँछन्, मिश्रले भने ।
श्रीराम सुगर मिलले २६ करोड, इन्दिरा सुगर मिलले ४ करोड ७० लाख, लुम्बिनी सुगर मिलले ८ करोड ४१ लाख तथा अन्नपूर्ण सुगर मिलले १७ करोड रुपयाँ उखु किसानलाई बुझाउन बाँकी छ ।
