काठमाडौं । वरिष्ठ उपाध्यक्षमा राजेन्द्र पाण्डेलाई रोक्न खोजेपछि नेकपा एकीकृत समाजवादी पदाधिकारी तथा पोलिटब्यूरो सदस्य छान्न निर्वाचन गराउनुपर्ने अवस्थामा पुगेको छ ।
अध्यक्ष माधवकुमार नेपालले वरिष्ठ उपाध्यक्षमा राजेन्द्र पाण्डेलाई सर्वसम्मत गराउन चाहेका थिए । तर सम्मानित नेता झलनाथ खनाल र महासचिव घनश्याम भुसाल पक्षले त्यसलाई अस्वीकार गर्यो । खनाल र भुसाल समूहले वरिष्ठ उपाध्यक्षमा प्रमेश हमाललाई अघि सारे । हुन त हमाल पनि माधवकुमार नेपाल पक्षकै नेता हुन् । तर खनाल र भुसालले राजेन्द्रलाई रोक्न नयाँ कार्ड फालेको बताइएको छ ।
त्यसो त अध्यक्ष नेपाल पनि आफ्नै समूहका दुई नेताले वरिष्ठ उपाध्यक्षमा दाबी गरेपछि ठोस निर्णयमा पुग्न सकेनन् । उनले ढुलमुले नीति लिएका थिए । सहमतिको प्रयासमा पनि उनले खास चासो दिन सकेनन् । अन्तत: चुनावबाटै वरिष्ठ उपाध्यक्ष छानिने भएको हो ।
एकीकृत समाजवादीमा वरिष्ठ उपाध्यक्षका लागि मात्र होइन, उपाध्यक्ष, उपमहासचिव र पोलिटब्यूरो सदस्यमा पनि आकांक्षी धेरै छन् । उपाध्यक्षका लागि ४० जनाभन्दा बढी र उपमहासचिवका लागि २० जना ।सचिवका लागि ६० भन्दा बढी आकांक्षी छन् ।
वरिष्ठ उपाध्यक्ष, उपाध्यक्ष, उपमहासचिव, सचिव र कोषाध्यक्ष गरी १८ पदका साथै ८४ पोलिटब्युरो सदस्य छान्न निर्वाचन गर्न लागिएको हो । पार्टीमा तीन सय ४४ सदस्यीय केन्द्रीय कमिटीको व्यवस्था छ ।
उम्मेदवारी दर्ता, दाबी विरोध, उम्मेदवारी फिर्ता, अन्तिम नामावली प्रकाशनलगायत कार्यक्रम आज बिहानदेखि सुरु भई, दिउँसो २ देखि पाँच बजेसम्म मतदान र साँझसम्म मतगणना गरिने निर्वाचन आयोगका अध्यक्ष माधव पौडेलद्वारा जारी तालिकामा उल्लेख छ ।
केन्द्रीय कमिटी सदस्यले मात्र निर्वाचन प्रक्रियामा सहभागी हुन पाउने छन् । सचिवालय सदस्य, स्थायी समिति सदस्य विभागलगायत संरचना केही दिनपछि निर्माण गर्ने जनाइएको छ । केन्द्रीय कमिटीमा हाल अध्यक्ष, सम्मानित नेता र महासचिव गरी तीन पदाधिकारी चुनिएका छन् ।
