एजेन्सी । बलिउड अभिनेत्री अदिति राव हैदरी र साउथ अभिनेता सिद्धार्थले बिहे गरेका छन् ।
तेलंगानाको वानापर्थीमा रहेको ४०० वर्ष पुरानो श्रीरंगपुर मन्दिरमा उनीहरुले गोप्य रुपमा विवाह गरेका थिए जसमा परिवारका सदस्यहरु मात्र सहभागी थिए ।
दुवैले विवाहको तस्बिर सामाजिक सञ्जालमा सेयर गरेका छन् । यसका साथै उनीहरुले एकअर्काका लागि मनमोहक नोट पनि लेखेका छन् ।
सिद्धार्थ र अदितिले २०२१ मा तमिल–तेलुगु फिल्म ‘महासमुद्रम’मा सँगै काम गरेका थिए । त्यसपछि यी दुईबीचको निकटता बढेको हो । ‘सिद्धार्थ’ले रंग दे बसन्ती र ‘चश्मेबद्दूर’जस्ता चर्चित बलिउड फिल्ममा समेत काम गरिसकेका छन् ।
अदिति राव हैदरी दक्षिण र हिन्दी चलचित्रकी चर्चित अभिनेत्री हुन् । उनले ‘पद्मावत’, ‘बोस’, ‘रकस्टार’ र ‘मर्डर–३’ जस्ता फिल्ममा काम गरिसकेकी छन् ।
अदिति र सिद्धार्थ दुवैको यो दोस्रो विवाह हो । सिद्धार्थको पहिलो विवाह सन् २००३ मा मेघना नामकी युवतीसँग भएको थियो । यो विवाह २००७ मा टुटेको थियो । अदितीको पहिलो विवाह अभिनेता सत्यदीप मिश्रसँग भएको थियो, जब उनी २१ वर्षकी थिइन् । चार वर्षपछि दुवैको सम्बन्धविच्छेद भयो ।
