काठमाडौं । प्रधानमन्त्री केपी शर्मा ओली संयुक्त राष्ट्रसंघको ७९ औँ महासभामा सहभागी हुन आज अमेरिकाको न्युयोर्क प्रस्थान गर्नुभयो । उहाँले नेपाली प्रतिनिधिमण्डलको नेतृत्व गर्दै आज त्यसतर्फ प्रस्थान गर्नुभएको हो । उहाँले महासभालाई सम्बोधन गर्ने कार्यक्रम छ ।
साथै यस भ्रमणकै क्रममा प्रधानमन्त्री ओलीले भारतीय समकक्षी नरेन्द्र मोदीसँग भेटवार्ता गर्नुहुने भएको छ । यही असोज ६ गते आइतबार अमेरिकाको स्थानीय समयअनुसार साँझ ५ः३० बजे उहाँहरूबीच भेटवार्ता हुन लागेको परराष्ट्र मन्त्रालय स्रोतले जानकारी दिएको छ ।
उहाँहरुको भेटवार्ताका लागि परराष्ट्र मन्त्रालयले तयारी गरिरहेको र भारतको विदेश मन्त्रालय पनि आन्तरिक तयारीमा जुटेको परराष्ट्र स्रोतले जनायो ।
परराष्ट्र मन्त्रालयको एक स्रोतले भन्यो– प्रधानमन्त्री ओली र भारतीय प्रधानमन्त्री मोदीबीचको भेटवार्ता निश्चित भएको छ । हिजोमात्र भेटवार्ता सुनिश्चित भएको खबर भारतीय विदेश मन्त्रालयबाट आएको छ । त्यस्तो कुनै परिवर्तन भएन भने सेप्टेम्बर २२ को साँझ उहाँहरूबीच भेटवार्ता हुनेछ,।
प्रधानमन्त्री ओली शनिबार र भारतीय प्रधानमन्त्री मोदी आइतबार न्युयोर्क पुग्ने कार्यक्रम छ । उहाँहरु न्युयोर्क पुगेलगत्तै भेटवार्ता हुने कार्यक्रम तय भएको हो ।
मोदीसँगको भेटवार्ता मिलाउन परराष्ट्र मन्त्रालय निकै पहिलादेखि तयारीमा थियो । यसअघि यही सेप्टेम्बरको सुरुमा बिमस्टेकको सम्मेलनका क्रममा भेटवार्ता हुने तय भएको भए पनि सो सम्मेलन स्थगित भएको थियो ।
