काठमाडौँ । सहकारीको रकम अपचलनको मुद्दामा पक्राउ परेका पूर्वडीआईजी छविलाल जोशीलाई काठमाडौँमा ल्याउन लागिएको छ ।
कालीमाटीस्थित स्वर्णलक्ष्मी बहुउद्देश्यीय सहकारीको रकम अपचलनमा संलग्नताबारे अनुसन्धान गर्न उनलाई मंगलबार काठमाडौँ ल्याउन लागिएको हो ।
गत असोज ६ गते सूर्यदर्शन सहकारीको रकम घोटालामा संलग्न आरोपमा प्रहरीले जोशीलाई पक्राउ गरेर अनुसन्धानको लागि पोखरा लगेको थियो ।
स्वर्णलक्ष्मी सहकारीको रकम गोरखा मिडिया नेटवर्कमा अवैध तरिकाले गएको भेटिएको छ । प्रारम्भिक अनुसन्धानबाट १ करोड ८२ लाख गोरखा मिडियामा अवैध तरिकाले गएको पाईएको जिल्ला प्रहरी परिसर काठमाडौँका एकजना अधिकृतले जानकारी दिए ।
स्वर्णलक्ष्मीका ६४५ जना बचतकर्ताले सहकारीको रकम घोटालामा संलग्न आरोपमा पूर्वगृहमन्त्री रवि लामिछाने र छविसहित २१ जनाविरुद्ध प्रहरीमा जाहेरी दिएका छन् । काठमाडौँ जिल्ला अदालतबाट उनीहरुविरुद्ध पक्राउ पुर्जी जारी भएसँगै अनुसन्धानको लागि काठमाडौ ल्यान लागिएको हो ।
यसअघि काठमाडौँ प्रहरीले स्वर्णलक्ष्मीका कोषाध्यक्ष कुमार रम्तेलसँग बयान लिएर पोखरा पठाएको छ ।
