एजेन्सी । साउथ अभिनेत्री सामन्था रुथ प्रभुका पूर्व पति नागा चैतन्यले शोभिता धुलिपालासँग दोस्रो विवाह गरेका छन् ।
दुवैले डिसेम्बर ४ मा हैदराबादको अन्नपूर्ण स्टुडियोमा विवाह गरेका थिए ।
यसैबीच सामन्थाले सामाजिक सञ्जालमा एउटा क्रिप्टिक पोस्ट सेयर गरेकी छिन् । अभिनेत्रीको यो पोस्ट सामाजिक सञ्जालमा निकै भाइरल भइरहेको छ ।
सामन्थाले सामाजिक सञ्जाल इन्स्टाग्राममा एउटा रहस्यमय पोस्ट सेयर गरेकी छिन् । अभिनेत्रीले आफ्नो इन्स्टा स्टोरीमा आगामी वर्ष २०२५ को लागि वृष, कन्या र मकर राशिका लागि भविष्यवाणी गरेको पोस्ट साझा गरेकी छिन् ।
अभिनेत्रीको पोष्टका अनुसार २०२५ मा यी राशि भएका व्यक्तिहरूको जीवनमा धेरै कुरा हुन सक्छ । यो वर्ष उनीहरूका लागि व्यस्त रहनेछ र उनीहरूले यसमा धेरै पैसा कमाउनेछन् । साथै पोस्टको चौथो लाइनमा वफादार र माया गर्ने पार्टनर पाउने र धेरै ठूला लक्ष्यहरू पूरा हुने लेखिएको छ । पोस्ट सेयर गर्दै अभिनेत्रीले लेखिन्–आमेन ।
सामन्था रुथ प्रभुले नागा चैतन्यसँग ६ अक्टोबर २०१७ मा गोवामा पहिले हिन्दू र त्यसपछि ७ अक्टोबरमा इसाई परम्परा अनुसार विवाह गरिन् । विवाहपछि सामन्थाले आफ्नो नाम अक्किनेनी राखेकी थिइन् ।
तर, बिछोडको खबरका बीच सामन्थाले आफ्नो ट्वीटर ह्यान्डलबाट अक्किनेनीलाई हटाएर सामन्था रुथ प्रभु बनाएकी थिइन् । अक्टोबर ६, २०२१ मा दुवैको वैवाहिक जीवनको चार वर्ष पूरा हुन लागेको थियो तर त्यसअघि नै दुवैको सम्बन्धविच्छेद भयो ।
