काठमाडौं । ‘नातिकाजी राष्ट्रिय संगीत सम्मान तथा पुरस्कार–२०८०’ घोषणा भएको छ । वरिष्ठ संगीतकर्मी नातिकाजीको ९९ औँ जन्म जयन्तीको अवसर पारेर बुधबार काठमाडौँमा एक कार्यक्रमका बिच पुरस्कार तथा सम्मान घोषणा गरिएको हो ।
नातिकाजी स्मृति समाजले आयोजना गरेको कार्यक्रममा विभिन्न स्रष्टा, संगीतकर्मी तथा सञ्चारकर्मीलाई यो सम्मान तथा पुरस्कार अर्पण गरिने समाजका अध्यक्ष वरिष्ठ संगीतकार शम्भुजीत बासकोटाले जानकारी दिनुभयो ।
घोषणा भए अनुसार नातिकाजी राष्ट्रिय विशेष सङ्गीत सम्मान गीतकार नगेन्द्र थापा , लोक गायक बोमबहादुर कार्की , कलाकार एवम् सञ्चारकर्मी धन लामा, सङ्गीत प्रबर्द्धक प्रकाश सायमी, शास्त्रीय सङ्गीतकर्मी ज्ञानुराधा गोर्खाली, गीतकार बुद्धवीर लामा, गायक दिवाकर खड्का, गीतकार किरण केसी क्रोधी, गायिका यशोदा पराजुलीलाई प्रदान गरिने भएको छ ।
यसैगरी नातिकाजी राष्ट्रिय सङ्गीत पुरस्कार गायक हिमाल सागर, गायिका बिन्दु परियार, गीतकार बि पाण्डे, सङ्गीतकार आशिष अविरल, एरेञ्जर सम्राट थापालाई प्रदान गरिने भएको छ ।
यसैगरी नातिकाजी राष्ट्रिय प्रतिभा पुरस्कारबाट रेकर्डिस्ट भोला पौडेल, गायक डेभिड शंकर, गायिका स्मिता दाहाल र सङ्गीतकार कल्याण सिहलाई प्रदान गरिने भएको छ ।
त्यस्तै शास्त्रीय सङ्गीत तर्फ डा. रमेश पोखरेललाई नातिकाजी राष्ट्रिय शास्त्रीय सङ्गीत पुरस्कार प्रदान गरिने घोषणा गरिएको छ ।
नातिकाजी राष्ट्रिय लोक सङ्गीत पुरस्कारबाट लोक गायकत्रय रामप्रसाद अवस्थी, सुष्मा शाही ठकुरी र कृष्ण बिकलाई प्रदान गरिने समाजले जनाएको छ ।
नातिकाजी राष्ट्रिय कला पत्रकारिता पुरस्कारबाट पत्रकारद्वय सुशील अर्याल र सुकृत नेपाललाई पुरस्कृत गर्ने समाजले जनाएको छ ।
यसैगरी सङ्गीत साधना प्रतिष्ठान नेपाल, इटहरी र लेखक बिमल भौकाजीलाई नातिकाजी राष्ट्रिय योगदान सम्मान प्रदान गरिने भएको छ । पुरस्कार एक विशेष कार्यक्रमका बीच प्रदान गरिने समाजले जनाएको छ ।
नातिकाजीको ९९ औँ जन्म जयन्तीका अवसरमा आयोजित कार्यक्रममा समाजका अध्यक्ष बासकोटाले नातिकाजी गीत सङ्गीतको महासागर भएको उल्लेख गर्दै उहाँको योगदानलाई जीवन्त राख्न राज्यलेपनि विशेष ध्यान दिनु पर्ने बताउनुभयो ।
