एजेन्सी । आईपीएल २०२५ को पहिलो खेल २१ मार्चमा कोलकातामा हुने भएको छ । प्रतियोगिताको फाइनल पनि यहीँ मे २५ मा हुनेछ । त्यस्तै, महिला प्रिमियर लिग (डब्लुपिएल) को तेस्रो सिजन फेब्रुअरी ७ बाट सुरु भई मार्च २ सम्म चल्नेछ । यसपटक प्रतियोगिता २ स्थानको सट्टा ४ स्थानमा खेलाइनेछ ।
क्रिकइन्फोको रिपोर्टका अनुसार आईपीएल कमिटीले सबै फ्रेन्चाइजीहरूलाई प्रतियोगिताको सुरुवातको विवरण पठाएको छ, ताकि उनीहरूले खेलाडीहरूको बारेमा आफ्नो तयारी सुरु गर्न सकून् ।
आईपीएलको डिफेन्डिङ च्याम्पियन कोलकाता नाइट राइडर्सले फाइनलमा सनराइजर्स हैदरावादलाई पराजित गरेको थियो ।
आईपीएलको पूर्ण तालिका जनवरीको अन्त्यमा सार्वजनिक हुनसक्छ ।
आईपीएलको मेगा अक्सन नोभेम्बरमा भएको थियो । त्यसपछि समितिले सबै टोलीलाई आगामी ३ वर्षको सम्भावित कार्यतालिका सुनायो । जस अनुसार यस पटक प्रतियोगिता मार्च १५ देखि मे २५ सम्म हुने थियो ।
तर, आईसीसी च्याम्पियन्स ट्रफीको फाइनल भने मार्च ९ मा हुनेछ । त्यसैले खेलाडीलाई आराम दिन बीसीसीआईले आईपीएल सुरु हुने मिति एक साता पछि सारेको हो ।
