सप्तरी । सप्तरीमा भेन्टिलेटर अभाव हुँदा हनुमाननगर कंकालिनी नगरपालिकाका कोरोना संक्रमित नगर प्रमुखलाई काठमाडौं रिफर गरिएको छ। कोरोना संक्रमणका कारण स्वास्थ्यमा समस्या देखिएपछि मेयर शैलेशकुमार साहलाई काठमाडौं रिफर गरिएको हो ।
मंगलबार प्रदेश २ का सामाजिक विकास मन्त्री नवलकिशोर साहका छोरा समेत रहेका नगर प्रमुख साहलाई कोरोना संक्रमणको पुष्टि भएको थियो। संक्रमण पुष्टि भएसंगै मेयर शाहलाई जनकपुरधामस्थित कोभिड अस्पतालमा उपचारका लागि भर्ना गरिएको थियो।
तर मेयर साहमा श्वासप्रश्वासको समस्या बढ्दै गएपछि काठमाडौं रिफर गरिएको कोभिड अस्पतालका फोकल पर्सन डा. रामदेव चौधरींले जानकारी दिए।
कोभिड अस्पतालमा भेन्टिलेटरको अभाव रहेकोले काठमाडौंस्थित हेम्स अस्पताल रिफर गरिएको डा. चौधरीले बताए। नगर प्रमुख साहमा निमोनियाको समस्या समेत देखिएको छ।
नगर प्रमुख साहसँगै उनको ३२ वर्षीय चालकमा समेत कोरोना संक्रमणको पुष्टि भएको बताइएको छ।
