काठमाडौं । जनता समाजवादी पार्टीकी सांसद नरमाया (प्रज्ञा) ढकालले कोरोनाको निषेधाज्ञाका कारण नागरिकले निकै सास्ती पाइरहेका तर सरकार भने कानमा तेल हालेर बसेको भन्दै आलोचना गर्नुभएको छ । उहाँले रोगले भन्दा भोकले मर्ने भइयो भन्दै भक्कानिएर रोइरहेकाहरूको आँशु कसले देख्ने भन्दै प्रश्न गर्नुभएको छ । उहाँले अफ्नो फेसबुक स्टाटसमा सरकाप्रति कैयौँ प्रश्न गर्नुभएको छ ।
ती प्रश्नहरुमा उहाँले देशको वर्तमान परिस्थितिमा पनि सरका मल देखि अरु धेरै क्षेत्रमा असंवेदनशील बनेको बताउनुभएको छ । साथै उहाँले अन्त्यमा प्रधानमन्त्री र मन्त्रीहरुलाई निरो नबन्न सुझाव दिनुभएको छ । रोम शहर जलिरहेका बेला निरो भने बाँसुरी बजाएर बसिरहेको दृष्टान्त पेश गर्दै उहाँले सरकारका मन्त्रीहरु र स्वयं प्रधानमन्त्रीलाई नै निरो नबन्न सुझाउनुभएको हो । उहाँको फेसबुक स्टाटस यहाँ प्रस्तुत गरिएको छ ।
'रोगले भन्दा भोकले मर्ने भइयो भन्दै भक्कानिएर रोइरहेकाहरूको आँशु कसले देख्ने ? एक छाक भोक टार्न भक्तपुरदेखि झम झम पानीमा भिज्दै थाल थाप्न टुंडिखेल आइपुग्नेहरूको आर्तनाद कसले सुन्ने ? कोरोना लागेपछि कसैको सहारा नपाउँदा क्वारेन्टाइनमा प्राण त्याग्नेहरूबारे कसले बोल्ने ? निषेधाज्ञाले घरमै थुनिँदा चुल्हो नबल्नेहरूको कष्ट कसले बुझ्ने ? मल नपाएर लहलह बाली मर्नै लाग्दा चिन्तित किसानको पीडा कसले सोध्ने ? जनताको जीवन र मानवियतासँग जोडीएका यस्ता दर्जनौं प्रश्नहरू मनमा उठिरहेका छन् । के सरकारमा बसिरहेकाहरूको मनमा यो कुरा उठ्दैन होला वा मननै ढुँगाको भइसक्यो ? मानवियता शून्य, संवेदना शून्य । जनता भोकले मरिरहँदा प्रधानमन्त्री र मन्त्रीज्यूहरू कतै देखिनुहुन्न । के सरकार हराएको हो यो देशमा ? कात्रोमा गोजी हुन्न भन्ने नबिर्सौ । संवेदनाहिन नबनोस् सरकार । निरो नबन्नुस् प्रधानमन्त्री र मन्त्री ज्यूहरू ।'
