काठमाडौं । राप्रपा नेपालका अध्यक्ष कमल थापाले लोकतन्त्रको आवारणमा जनता लुट्ने काम भएकाले जनताले राजा खोजीरहेको दाबी गर्नुभएको छ । उहाँले राजालाई दया गरेर कारबाही नगरेको गफसमेत नदिन चुनौती दिनुभएको छ ।
अध्यक्ष थापाले सामाजिक सञ्जालमार्फत् जनताले १७ हजार मान्छे मराउने र युवालाई विदेश पलायन हुन बाध्य पारेर देश लुट्नेहरुलाई जनताले कारबाही गर्ने बताउनुभएको छ ।
उहाँले डर, त्रास देखाएर नभइ जनतालाई केन्द्रमा राखेर सबै नेपाली अटाउने मौलिक प्रजातन्त्रको विकास गर्नसमेत अपील गर्नुभएको छ ।
अध्यक्ष थापाले आफ्नो सामाजिक सञ्जालमा के लेख्नुभएको छ त ?
गणतन्त्रको वकालत गर्नुहोस् ठिक छ । विचार आ–आफ्नो हो । तर, राजालाई दया गरेर कारवाही नगरेको गफ नदिनुस् । जनता साक्षी छन् । २०६३ को आन्दोलन दरवार र दलहरुबीच सम्झौता भएर टुङ्गिएको हो । राजाले ईमान्दारिपूर्वक सम्झौताको पालना भयो । तर, दलहरुले आन्दोलनको रापताप र बिदेशीको दवावमा सम्झौता विपरित राजसंस्था पाखा लगाउने काम गरे ।
लोकतन्त्रको आवरणमा १८ वर्ष देश र जनतालाई लुट्ने काम भयो । अहिले जनताले राजा खोजिरहेका छन् ।
कारवाही नै गर्ने हो भने अब जनताले १७ हजार मार्ने मराउने, युवालाई विदेश पलायन हुन वाध्य पार्ने र देश लुट्नेहरुलाई कारवाही गर्छन् ।
त्यसैले डर त्रास देखाएर होइन, देश र जनतालाई केन्द्रविन्दुमा राखेर सबै नेपाली अटाउने मौलिक प्रजातन्त्रको विकास गरौं ।
