बाजुरा । गृहमन्त्री रामबहादुर थापाले बाजुरामा साउनको अन्तिम साता बाढी पहिरोबाट क्षति पुगेको क्षेत्रको मंगलबार स्थलगत अवलोकन गर्नुभएको छ ।
साउन २५ गते रातिको अविरल वर्षाका कारण गएको बाढी र पहिरो गएको क्षेत्रको अवलोकन तथा प्रभावितलाई राहत वितरण पनि गरिएको छ ।
बाढी र पहिरोबाट प्रभावित गौमुल गाउँपालिका–सिमका ५० परिवार र बडीमालिका नगरपालिकाका–२ घागरका ७५ परिवारलाई राहत वितरण गरिएको गृहमन्त्रीका सल्लाहकार सूर्य सुवेदीले जानकारी दिनुभयो ।
बाढी र पहिरोबाट विस्थापित भएका १०० बढी परिवारलाई खाद्यान्नसहित अन्य अत्यावश्यक सामग्री वितरण गरिएको छ ।
यसैगरी गौमुल गाउँपालिका–२ सिमका ५० परिवारलाई बाल्टिन, अन्य भाडाकुँडा, खाद्यान्नलगायत सामग्री नेपाली सेनाको हेलिकप्टरमार्फत बाढीपहिरो पीडितलाई वितरण गरिएको छ ।
मन्त्री थापासँग प्रतिनिधिसभाका बाजुरा सदस्य लालबहादुर थापा, पूर्वउद्योगमन्त्री तथा नेकपा सुदूरपश्चिम प्रदेश अध्यक्ष कर्णबहादुर थापा, सुदूरपश्चिम प्रदेश आन्तरिक मामिला तथा कानूनमन्त्री प्रकाश शाह, बडीमालिका नगरपालिकाका नगरप्रमुख पदम बडुवाल र प्रमुख जिल्ला अधिकारी कृष्ण गैरेलगायतका टोली प्रभावित क्षेत्र पुगेका थिए।
