महोत्तरी। महोत्तरीका एक पुरुषमा मृत्यु भएको दुई दिनपछि कोरोना संक्रमण पुष्टि भएको छ । गत सोमबार जनकपुरधामस्थित राम जानकी अस्पतालमा मृत्यु भएका मटिहानी नगरपालिकाका-६ का ५२ वर्षीय पुरुषको दुई दिनपछि कोरोना संक्रमण पुष्टि भएको हो ।
फोक्सो र मधुमेहका बिरामी उनलाई ज्वरो आएपछि आइतबार नै अस्पतालमा भर्ना भए पनि सोमबार स्वाब संकलन गरिएकै दिन राति ९ बजेतिर अस्पतालमै उनको मृत्यु भएको मटिहानी नगरपालिकाका मेयर हरी मण्डलले बताए ।
अस्पतालमा मृत्यु भएका ती पुरुषको शवलाई गाउँ ल्याएर अन्तिम संस्कार गरिसकेपछि मंगलबार राति रिपोर्ट पोजेटिभ आएको मण्डलले बताए ।
प्रमुख जिल्ला अधिकारी कृष्णबहादुर कटुवालले पनि मृतकको अन्तिम संस्कार गरिसकिएको अवस्थामा रिपोर्ट पोजेटिभ आएको बताएका छन् ।
मृतक पुरुषको ५६ जना मलामी गएका थिए । मलामी गएका ५६ जनालाई होम क्वारेन्टिनमा राखिएको प्रमुख जिल्ला अधिकारी कटुवालले बताए ।
