एजेन्सी । सोमबार बलिउड अभिनेता सलमान खानलाई मार्ने धम्की दिने व्यक्तिलाई प्रहरीले पक्राउ गरेको छ ।
सलमानको लागि यो म्यासेज वडोदरा नजिकैको एउटा गाउँबाट पठाइएको थियो । म्यासेज पठाउने व्यक्ति २६ वर्षका छन् ।
अप्रिल १४ मा उनले मुम्बईको वरली क्षेत्रमा रहेको यातायात विभागको आधिकारिक व्हाट्सएप नम्बरमा एउटा म्यासेज पठाएका थिए, जसमा सलमान खानलाई उनको घर भित्र घुसेर मार्ने र उनको कारलाई बमले उडाइदिने भनेर लेखिएको थियो ।
एएनआईको हालैको रिपोर्ट अनुसार, सलमान खानलाई धम्की दिने व्यक्ति वडोदरा नजिकैको गाउँमा बस्ने २६ वर्षीय केटाको रूपमा पहिचान गरिएको छ ।
सुरुमा, प्रहरीले समन पठाएको थियो र उनलाई २–३ दिनभित्र उपस्थित हुन आदेश दिइएको थियो । तर, मुद्दाको गम्भीरतालाई ध्यानमा राख्दै उनलाई सोमबार नै पक्राउ गरिएको हो । हाल उनको नाम खुलाइएको छैन ।
रिपोर्टका अनुसार अनुसन्धानबाट सन्देश पठाउने व्यक्तिको मानसिक अवस्था राम्रो नभएको पत्ता लागेको छ । परिवारले उनको उपचार भइरहेको दाबी गरेको छ । यो तथ्य पत्ता लगाउन प्रहरी अनुसन्धान जारी छ ।
