लन्डन । मंगलबार इंग्लिस प्रिमियर लिगमा एस्टन भिल्लाले आर्सनललाई १–० ले हराएर रेलिगेसन क्षेत्र छाडेको छ । एस्टन भिल्लालाई बहुमूल्य जित दिलाउन इजिप्टका विन्गर ट्रेज्ग्वेटले निर्णायक गोल गरे ।
डिन स्मिथको क्लबले अब रेलिगेसनबाट बच्न आफ्नो भाग्य आफै लेख्न सक्नेछ । मंगलबारको अर्को खेलमा म्यानचेस्टर सिटीले वाटफोर्डलाई ४–० ले हराएरपछि यो समीकरण तयार भएको हो ।
वाटफोर्ड भने पुछारबाट तेस्रो स्थानमा पुगेको छ । सन् १९९८ यता एस्टन भिल्लाले लिगमा आर्सनललाई हराएको यो पहिलो पल्ट हो । एस्टन भिल्ला र वाटफोर्ड दुवैको समान ३४ अंक छ ।
एस्टन भिल्ला गोल अन्तरले अगाडि रहेको छ । अब लिगको अन्तिम दिनको खेलमा आइतबार उसले वेस्ट ह्यामको सामना गर्नेछ भने वाटफोर्डले आर्सनलको भ्रमण गर्नेछ । यस्तै पुछारबाट दोस्रोमा रहेको बर्नमाउथले एभर्टनविरुद्ध खेल्नेछ ।
