काठमाडौं । रुपन्देही क्षेत्र नं. ३ मा हुने उपनिर्वाचनमा नेकपा एमालेले खिमलाल भट्टराईलाई उम्मेदवार बनाउने तयारी गरेको छ ।
आगामी मंसिरमा यो निर्वाचन क्षेत्रमा उपनिर्वाचन गराउने तयारी निर्वाचन आयोगको छ ।
पछिल्लो संसदीय निर्वाचनमा रुपन्देही ३ बाट राष्ट्रिय प्रजातन्त्र पार्टी (राप्रपा) का दीपक बोहरा निर्वाचित बनेका थिए । तर, २०८१ चैत १९ गते उनको निधन भएपछि उक्त क्षेत्र रिक्त छ । रिक्त उक्त स्थानमा एमालेले भट्टराई उम्मेदवार बनाउने तयारी गरेको हो ।
भट्टराई पार्टीको केन्द्रीय विपद् व्यवस्थापन विभाग प्रमुख हुन् । राष्ट्रिय सभाका पूर्वसदस्यसमेत रहेका उनी पार्टीको पोलिटब्यूरो सदस्य हुन् । भट्टराईसहित त्यहाँ दधिराम न्यौपाने, भरत पोखरेल, हरि अधिकारीलगायतका नेताहरू आकांक्षी छन् । तर पार्टीले उनलाई नै उम्मेदवार बनाउने तयारी गरेको हो ।
गत निर्वाचनमा प्रतिस्पर्धा गर्न राष्ट्रियसभा सदस्यबाट राजीनामा दिएर भट्टराईले रुपन्देही क्षेत्र नं. ५ बाट उम्मेदवारी दिएका थिए । तर त्यही क्षेत्रमा बासुदेव घिमिरेको पनि उम्मेदवारी परेको थियो। एउटै पार्टीका दुई जनाको उम्मेदवारी परेपछि घिमिरेको उम्मेदवारी स्वीकृत भएको थियो ।
राष्ट्रिय सभाबाट राजीनामा दिएर पनि प्रतिनिधि सभाको निर्वाचनमा प्रतिस्पर्धा गर्न नपाएपछि भट्टराई संसदीय गतिविधिमा ओझेलमा परेका थिए ।
