एजेन्सी । बलिउड अभिनेता आमिर खानले दिल्लीमा राष्ट्रपति द्रौपदी मुर्मुलाई भेटे ।
यो भेट दिल्लीको राष्ट्रपति भवनमा भएको थियो, जहाँ आमिरले हालै रिलिज भएको आफ्नो फिल्म ‘सितारे जमीन पर’को विशेष स्क्रिनिङको आयोजना गरेका थिए । यस समयमा फिल्मका सम्पूर्ण कलाकारहरू उपस्थित थिए ।
यसबारे जानकारी दिँदै भारतका राष्ट्रपतिको आधिकारिक एक्स प्लेटफर्मबाट विशेष स्क्रिनिङका तस्बिरहरू सेयर गरिएको छ ।
पोस्टमा आमिर खान र द्रौपदी मुर्मुको तस्बिरसँगै लेखिएको छ, ‘लोकप्रिय फिल्म निर्माता तथा अभिनेता श्री आमिर खानले राष्ट्रपति भवनमा राष्ट्रपति द्रौपदी मुर्मुलाई भेटेका छन् ।’
फिल्ममा न्यूरोडाइभर्जेन्ट अवस्थाबाट पीडित वास्तविक मानिसहरूलाई चित्रण गरिएको छ, जसले विविधता, समानता र समावेशीकरणको सन्देश दिन्छ ।
आमिर खानको प्रोडक्सन हाउसको फिल्म ‘सितारे जमिन पर’ जुन २० मा रिलिज भएको छ । आमिर खान र जेनेलिया डिसुजा बाहेक, फिल्ममा डाउन सिन्ड्रोमबाट पीडित बालबालिकाहरू पनि महत्त्वपूर्ण भूमिकामा छन् । यो फिल्म एक बास्केटबल प्रशिक्षकमा आधारित छ जो यी बच्चाहरूको प्रशिक्षक बन्छ ।
