सुर्खेत। वीरेन्द्रनगर नगरपालिका–१३ स्थित करेखोलामा एक व्यक्तिले आफ्नै श्रीमतीको ज्यान लिएका छन्।
जिल्ला प्रहरी कार्यालय सुर्खेतका अनुसार करिब ४२ वर्षीय दानसिंह ठाडा मगरले आफ्नी ४० वर्षीया पत्नी रविना ठाडा मगरको काठले टाउकोमा प्रहार गरी हत्या गरेका हुन्।
प्रहरी नायव उपरीक्षक मोहनजंग बुढ्थापाका अनुसार, शनिबार राति करिब १ः४० बजे सुतिरहेकी श्रीमतीमाथि दानसिंहले खाटको खुट्टा बनाउन राखिएको काठको टुक्राले आक्रमण गरेका थिए। कडा प्रहारका कारण रविनाको घटनास्थलमै मृत्यु भएको थियो।
घटनाको जानकारी स्थानीयले राति करिब २ः३० बजे प्रहरीलाई दिएका थिए। सूचना प्राप्त हुनेबित्तिकै अस्थायी प्रहरी बिट करेखोलाबाट टोली घटनास्थल पुगेको थियो। प्रहरीले आरोपी दानसिंहलाई तत्काल नियन्त्रणमा लिएको छ।
जिल्ला प्रहरी कार्यालयका अनुसार घटनाको थप अनुसन्धानका लागि प्रहरी निरीक्षक राजनप्रसाद भट्टराईको नेतृत्वमा १० सदस्यीय टोली परिचालन गरिएको छ। प्रारम्भिक जानकारी अनुसार दानसिंह मानसिक रोगी रहेको बताइएको छ। घटनाबारे विस्तृत अनुसन्धान भइरहेको प्रहरीले जनाएको छ।
