काठमाडाैंः नेपाली सेनाकाे समरी जनरल सैनिक अदालतले सम्पत्ति र अनुशासन तथा आचरण सम्बन्धी कसूर गरेको अभियोगमा अवकाश प्राप्त उपरथी सुधिर श्रेष्ठलाई दोषी ठहर गर्दे कारबाही गरेको छ ।
जेष्ठ १६ गते बसेको समरी जनरल सैनिक अदालतले सैनिक हवाई महानिर्देशनालय, गौचरमा कार्यरत रहंदा सम्पत्ति र अनुशासन तथा आचरण सम्बन्धी कसूर गरेको अभियोगमा सैनिक ऐन २०६३ बमोजिम ५८ लाख ९५ हजार ५९० रुपैयाँ असुल उपर गर्ने तथा नसिहत दिने गरी फैसला गरेको सैनिक जनसम्पर्क निर्देशनालयले जनाएको छ । श्रेष्ठले उक्त रकमकाे हिसाब किताब नै नराखेकाे अदालतकाे ठहर छ ।
यसै गरी आठ जना सैनिक अधिकृतहरुलाई सचेत गराउनुका साथै एक जना अधिकृत तथा नौजना अन्य दर्जाहरुलाई सफाइ दिने गरी फैसला गरिएको निर्देशनालयले जनाएको छ ।
सैनिक हवाई महानिर्देशनालय रहँदा अनियमता गरेको भन्ने उजुरीका आधारमा छानबिन गर्न रथीको अध्यक्षतामा गठित कोर्ट अफ इन्क्वायरी बोर्डको रायमा आधारमा तत्कालिन महानिर्देशक पाइलट उपरथी सुधिर श्रेष्ठ सहित अन्य माथि छानबिन गगरिएको थियो ।
नेपाली सेनाले पद्धति र प्रणालीमा आधारित संगठन सन्चालनमा जोड दिंदै पारदर्शिता र जवाफदेहिता कायम गर्ने तथा दण्डहिनताको अन्त्य गर्ने लक्ष्य अनुसार अनुशासन र आचरण बिपरित कार्य गर्नेहरुलाई कारवाही गरिएको जनाएको छ ।
