काठमाडौँ । प्रतिनिधि सभा तथा राष्टिय सभाको आजको संयुक्त बैठक भर्खरै शुरु भएको छ । बैठक सुरु भएसँगै सभामुखले अर्थमन्त्री डा.युवराज खतिवडालाई आर्थिक वर्ष २०७७/७८ को बजेट प्रस्तुत गर्न लागि समय दिएपछि अर्थमन्त्री डा।खतिवडाले बजेट भाषण शुरु गर्नुभएको छ ।
यो बजेटमा नयाँ कुनै कार्यक्रमहरु घोषणा नहुने कुरा सरकारले यसअघि नै विभिन्न संकेतहरु दिइसकेको छ । विश्वमा फैलिएको कोरोना भाइरसको महामारीले नेपाललाई पनि क्षति पुगेको छ । यहाँ पनि महामारीका संक्रमितहरुको संख्या एक हजार नाघिसकेको छ ।
त्यसैले नेपाल सरकारले यसवर्षको बजेटमा पनि सो संक्रमणको नियन्त्रणमा जोड दिने बताइएको छ । त्यसैगरी नेपालका लाखौँ युवा वैदेशिक रोजगारीमा रहेकोमा ती देशमा कोरोनाको महामारीबाट स्वदेश फर्किनुपर्ने अवस्था छ । यसरी विगतमा रेमिटेन्सले धानेको नेपालको अर्थतन्त्रमा अब आगामी दिनमा के होला भनेर पनि चिन्ता बढेको छ । त्यसैले यो अवस्थामा ती युवाको व्यवस्थापनका साथै उनीहरुलाई नेपालमै कृषि कर्ममा लगाउने बारेमा सरकारले कृषि तथा स्वदेशमै स्वआर्जनका कार्यक्रमहरु घोषणा गर्ने अनुमान गरिएको छ ।
