काठमाडौं। मेडिकल व्यवसायी दुर्गा प्रसाईंलाई धरौटीमा रिहा भएपछि डिल्लीबजार कारागार फर्किँदा कांग्रेस सांसद डा. सुनिल शर्मा स्वागत गर्न पुगेका छन् ।
उच्च अदालत पाटनको आदेशपछि प्रसाईं सोमबार साँझ २८ लाख रुपैयाँ धरौटी बुझाएर कारागार पुगेका हुन् । अहिले कारागार प्रशासनले बाँकी कानुनी प्रक्रिया पूरा गर्दैछ ।
प्रसाईंविरुद्ध बैंकिङ कसुर र १५ चैतमा भएको राजावादी आन्दोलनसँग सम्बन्धित गरी दुईवटा मुद्दा दर्ता भएका थिए । दुवै मुद्दामा उच्च अदालत पाटनले उनलाई धरौटीमा छाड्न आदेश दिएको हो ।
बैंकिङ कसुरसम्बन्धी मुद्दामा उच्च अदालत पाटनका न्यायाधीश सुदर्शनदेव भट्ट र मुनेन्द्रप्रसाद अवस्थीको इजलासले २५ लाख रुपैयाँ धरौटी तोकेको थियो । यस्तै, राजावादी आन्दोलनसम्बन्धी मुद्दामा न्यायाधीश टंकप्रसाद गुरुङ र डिल्लीरत्न श्रेष्ठको इजलासले ३ लाख रुपैयाँ धरौटीमा रिहा गर्ने आदेश दिएको हो ।
धरौटी बुझाएपछि प्रसाईं केहीबेरअघि मात्र डिल्लीबजारस्थित कारागार पुगेका हुन् ।
