काठमाडौँ । भूमि व्यवस्था, सहकारी तथा गरिबी निवारण मन्त्रालयले नेपालको राजनीतिक मानचित्र समेटिएको नक्सा सार्वजनिक गरेको छ ।
मन्त्रालयमा आयोजित कार्यक्रम मन्त्री पद्मा अर्यालले लिपुलेक, लिम्पियाधुरा र कालीपानी समेटिएको नक्सा सार्वजनिक गर्नुभएको हो । । जेठ ५ गते बसेको मन्त्रीपरिषद्ले लिपुलेक, लिम्पियाधुरा र कालीपानीसहितको नयाँ नक्सा स्वीकृत गरेको थियो ।
नेपालको संसोधित नक्सा कुल क्षेत्रफल १ लाख ४७ हजार ४ सय ९१ वर्ग किलाेमिटर रहेकाे छ । सार्वजनिक गरिएको राजनीति तथा प्रशासनिक नक्सामा सात प्रदेश, ७७ जिल्ला र ७५३ स्थानीय तहका नगर र गाउँपालिका समेत देखाइएकाे छ ।
नयाँ नक्सामा लिम्पियाधुरा, लिपुलेक र कालापानीसँगै गुञ्जी, नाबी र गुटी लगायतका क्षेत्रपनि समेटिएको मन्त्री अर्यालले बताउनुभयो । राष्ट्रियता र सम्प्रभुताको रक्षाका लागि नेपाल सरकार प्रतिवद्ध रहेको उल्लेख गर्दै मन्त्री अर्यालले नेपालको सो कदमलाई भारतले पनि सकारात्मक रुपमा लिने विश्वास व्यक्त गर्नुभयो ।
नेपालसँग उपलब्ध प्रमाण र तथ्यले देखाएको बाटोमा सधै अगाडी बढ्ने उहाँले बताउनुभयो । नेपालको सम्पूर्ण भूमि समेटिएको नक्सा सार्वजनिक हुनु सिंगो नेपालीहरुका लागि ऐतिहासिक सुखद क्षण भएको उहाँले बताउनुभयो ।
नक्सा सार्वजनिक कार्यक्रममा मन्त्री अर्यालले नयाँ नक्सा सार्वजनिक भएपछि विश्वमा नेपालको माननित्र, नेपालीको मान र नेपालीको मन बदलिएको समेत बताउनुभयो । सरकारले नेपाल र नेपालीको शीर झुक्न नदिने उल्लेख गर्दै नक्सा प्रयोग हुने सम्पूर्ण सरकारी दस्तावेज र पाठ्यपुस्तकमा नयाँ नक्सा प्रयोग गर्न पनि मन्त्री अर्यालले आग्रह गर्नुएको छ ।
मन्त्री पद्मा अर्याल नेपालकाे नयाँ राजनीतिक नक्सा सार्वजनिक गर्दै
