एजेन्सी । इंग्लिस प्रिमियर लिग फुटबल अन्तर्गत आर्सनलले सहज जित निकालेको छ । आइतबार राति भएको खेलमा आर्सनलले लेसटर सिटीलाई २-० गोलले पराजित गरेको हो ।
आर्सनलको घरेलु मैदान इमिरेट्स स्टेडियममा भएको खेलको ११ औं मिनेटमा आर्सनलले सुरुवाती अग्रता लिएको थियो । आर्सनलका थोमस पार्टेले गोल गर्दै आर्सनललाई सुरुवाती अग्रता दिलाएका हुन् । खेलको पहिलो हाफसम्म आर्सनल १-० गोलले अघि रह्यो ।
५९ औं मिनेटमा आर्सनलले पेनाल्टीको अवसर पायो । जसलाई अलेक्जान्ड्र लाकाजेटले खेर जान दिएनन् । उनले गोल गर्दै आर्सनलको अग्रता दोब्बर पारे । त्यसपछि खेलमा दुबै टिमले गोल गर्न प्रयास गरेपनि थप गोल भने हुन सकेन ।
जितसँगै आर्सनल पुनः अंकतालिकाको शीर्ष चारमा उक्लिएको छ । उसको २६ खेलबाट ५१ अंक छ । यता, पराजित लेस्टर भने २६ खेलबाट ३३ अंकसहित १२ औं स्थानमा छ ।
यस्तै, आइतबार राति नै भएको अर्को खेलमा चेल्सीले कठिन जित निकालेको छ । चेल्सीले न्युक्यासल युनाइटेडलाई १-० गोलले पराजित गरेको हो ।
घरेलु मैदानमा चेल्सीलाई जित दिलाउन एकमात्र निर्णायक गोल खेलको ८९ औं मिनेटमा काई हाभेट्र्जले गरे ।
२८ खेलबाट ५९ अंक जोडेको चेल्सी अंकतालिकाको तेस्रो स्थानमा यथावत छ । समान खेल खेलेको न्युक्यासल ३१ अंकसहित १४ औं स्थानमा छ ।
