काठमाडौं । जेनजी आन्दोलनपछि पहिलो पटक ३४ दिनपछि आज सार्वजनिक भएका नेपाली कांग्रेसका सभापति शेरबहादुर देउवाले पार्टीको कार्यबाहक सभापति सो पार्टीका उपसभापति पूर्णबहादुर खड्कालाई दिएका छन् । पूर्णबहादुर शेरबहादुर देउवा कित्ताका पुरानै नेता हुन् ।
यो अपेक्षित नै थियो कि उनी खड्कालाई नै कार्यबाहक दिने तयारीमा थिए । किनभने पार्टीको नेतृत्व हस्तान्तरणको आवाज उठाउँदै आएका महामन्त्रीद्वय गगन थापा र विश्वप्रकाश शर्माले आफ्ना पार्टी सभापति देउवामाथि भएको सांघातिक हमलापछि सार्वजनिक रुपमा कुनै पनि दुःख मनाउ गरेका थिएनन् ।
यसबीचमा उनीहरुले अनेक थरि भिडियो बनाए, फेसबुकमा पोष्ट गरे र जेनजीको माग अनुसार नै पार्टी रुपान्तरणको अभियान आफूहरुले सुरु गर्ने बताए ।
तर पनि आफ्नै बहालवाला पार्टी सभापतिमाथि रक्ताम्मे हुनेगरी गरेको कुटपिटका भिडियोहरु भाइरल हुँदा पनि महामन्त्रीजस्तो पार्टीको कार्यकारी पदमा रहेका व्यक्तिले दुवै जनाले सल्लाह नै गरेजस्तो गरी कुनै पनि विरोध नगरेको भन्दै देउवाले पार्टीकै कतिपय पदाधिकारीहरुसँथ चित्त दुखाएका थिए ।
उनी यसकारण पनि यी दुईले अघि सारेको विशेष महाधिवेशन गराउने पक्षमा थिएनन् । अहिलेलाई कार्यबाहक दिने र नियमित महाधिवेशनमै जाने उनको मनस्थिति थियो ।
भदौ २४ को आफूमाथिको हमलापछि बरु कांग्रेस नेता डा शेखर कोइरालाले देउवाप्रति निकै सदासयता देखाएका थिए । उनले सार्वजनिक रुपमा नै सो हमलाको निन्दा गरेका थिए । समयम समयमा फोन गरेर सभापतिको स्वास्थ्य लाभको कामना गरेका पनि थिए ।
तर उनलाई कार्यबाहक दिन भने विधानले नमिलेको बताउँछन् कांग्रेस नेताहरु । यस विषयमा पनि चर्चा भएको तर कार्यबाहक चाहिँ उपसभापतिलाई नै दिनुपर्ने पार्टी विधान रहेको उनी निकटका एकजना नेता स्मरण गराउँछन् ।
यसकारण आज केन्द्रीय समितिको बैठकलगत्तै देउवाले उपसभापति खड्कालाई कार्यबाहक दिएका छन् । तर त्यो कार्यबाहक कहिलेसम्म हो भन्ने कुरा खुलेको पनि छैन ।
मिडियामा आएअनुसार सभापति देउवा स्वास्थ्य उपचारका लागि सिंगापुर जाँदैछन् । यदि त्यसो हो भने आफू नेपालमा नहुञ्जेलका लागि कार्यबाहक दिएका हुन् त देउवाले ? कि अर्काे महाधिवेशन नुहञ्जेललाई नै दिएका हुन् ? यो स्पष्ट भएको छैन ।
तर महामन्त्री थापाले भने अब देउवा पार्टी सभापतिमा नफर्कने जनाउ दिएका छन् । उनले यो नै सभापतिका हैसियतमा देउवाको अन्तिम सम्बोधन रहेको बताए ।
यसलाई पनि कतिपयले महामन्त्री थापाले निकै हतार गरेको बताएका छन् । थापाले अहिले नै र आजै त्यसो भन्न नहुने कतिपयले बताएकाछन् भने कतिले देउवालाई सभापतिबाट विदाई गर्न थापाले गरेको हतारका रुपमा पनि व्यख्या गरेका छन् ।
यसैलाई कांग्रेस भित्रै र बाहिर पनि उनले आज पूर्णबहादुरलाई दिएको कार्यबाहक पूर्ण हो कि अपूर्ण भनी टिप्पणी गरिरेहका छन् ।
