काठमाडौँ । हमासको आक्रमणपछि बन्धक बनाइएका नेपाली विद्यार्थी विपिन जोशीको पार्थिव शरीर आज नेपाल ल्याइएको छ ।
जोशीको पार्थिव शरीर इजरायलबाट आज अपरान्ह २ः३५ बजे त्रिभुवन अन्तर्राष्ट्रिय विमानस्थलमा ल्याइएको हो । विमानस्थलमा आयोजित शोकसभामा प्रधानमन्त्री सुशीला कार्कीले स्वर्गीय जोशीप्रति श्रद्धाञ्जली अर्पण गर्दै शोकसंतप्त परिवारजनप्रति गहिरो समवेदना व्यक्त गर्नुभयो । प्रधानमन्त्री कार्कीले राष्ट्रिय झण्डा ओढाएर जोशीलाई सरकारी सम्मान पनि प्रदान गर्नुभयो ।
शोकसभामा ऊर्जा, जलस्रोत तथा सिँचाइ मन्त्री कुलमान घिसिङ, गृहमन्त्री ओम प्रकाश अर्याल, सञ्चार तथा सूचना प्रविधि मन्त्री जगदीश खरेल, मुख्य सचिव एकनारायण अर्याल, परराष्ट्र सचिव अमृतबहादुर राई, नेपालका लागि इजरायली राजदूतलगायतका उच्च अधिकारीहरूको उपस्थितिमा श्रद्धाञ्जली अर्पण गरिएको थियो ।
विदेश अध्ययनका क्रममा इजरायल पुगेका विपिन जोशी सन् २०२३ अक्टोबर ७ मा हमासले किबुत्ज क्षेत्रमा गरेको आक्रमणका क्रममा बन्धक बनाइएका थिए । लामो समयसम्म उनको अवस्था अज्ञात रहँदै आएकोमा गत असोज २७ गते इजरायली अधिकारीहरूले उनको मृत्यु पुष्टि गरेका थिए ।
इजरायल र हमासबीच युद्धविरामपछि बन्दी साटासाट प्रक्रियाका क्रममा हमासले विपिनको शव इजरायली पक्षलाई हस्तान्तरण गरेको थियो । डीएनए परीक्षण र फरेन्सिक जाँचका आधारमा शव विपिनकै भएको पुष्टि भएको इजरायलस्थित नेपाली दूतावासका अधिकारीहरूले जनाएका छन् ।
नेपाल ल्याउनुअघि आइतबार तेल अवीवस्थित खटिभा ८ स्मारक र बेनगुरिएन विमानस्थलमा उनको पार्थिव शरीरप्रति श्रद्धाञ्जली अर्पण गरिएको थियो । श्रद्धाञ्जलीका क्रममा उनको कफिनमा नेपाली झण्डा ओढाइएको थियो ।
विपिनको शव आजै कञ्चनपुरको भिमदत्तनगरस्थित घरमा लगिने र त्यहीँ अन्तिम दाहसंस्कार गरिने तयारी गरिएको छ ।
